د پروان اوسېدونکو افغانستان انټرنشنل ته هغه عکسونه استولي، چې په کې یوه بې پیلوټه الوتکه د دغه ولایت په فضا کې الوتنه کوي. تر اوسه مالومه نه ده، چې دغه الوتکه د کوم هېواد ده. تر دې وړاندې په یوشمېر نورو ولایتونو کې هم د بې پیلوټه الوتکو د الوتنو په اړه راپورونه خپاره شوي وو.
د پروان ولایت یوه اوسېدونکي ویلي، دغه الوتکه یې د چهارشنبې په ورځ سهار نهه بجې د وري په ۲۹مه نېټه لیدلې ده.
طالبانو تر اوسه په دې اړه څه نه دي ویلي؛ خو پخوا یې امریکا تورنه کړې وه، چې د افغانستان پر هوایي حریم تېری کوي.
په تېرو ورځو کې د بدخشان، پنجشیر، کونړ او لغمان خلکو افغانستان انټرنشنل ته ویلي وو، چې د دوی پر ولایتونو بې پیلوټه الوتکې الوتنې کوي.
په کندهار کې هم څو ځلې دغه بې پیلوټه الوتکې لیدل شوې، چې یو ځلې د وري په ۱۴مه سرچینو ویلي و چې یوې بې پیلوټه الوتکې د طالبانو د مشر ملا هبت الله د دفتر پر سر د څو ساعتونو لپاره الوتنې کړې.
سرچېنو ویلي و، چې دغو الوتنو طالبان اندېښمن کړي وو او له همدې امله یې د خپل مشر د استوګنې ځای بدل کړ.
د طالبانو ویاند د دغو الوتنو په غبرګون کې امریکا د افغانستان له هوايي حریم څخه په «سرغړونه» تورنه کړې وه.
تر دې وړاندې ځینو سرچېنو افغانستان انټرنشنل ته ویلي وو، چې د روانې میاشتې په پیل کې یوې بې پیلوټه الوتکې د غزني په ګېرو ولسوالۍ برید کړی و چې له امله یې ۱۲ کسه وژل شوي وو.
طالبانو له هغې پېښې لږ وړاندې ویلي و، دغه پېښه د یوې سرګلولې د چاودنې له امله شوې چې د هغوی په وینا پنځه مېرمنې او څلور ماشومان یې وژلي وو.
خو سرچېنو د طالبانو دغه خبره رد کړې او ویلی یې و، پېښه د بې پیلوټه الوتکې د برید له امله شوې چې په پایله کې یې ۱۲ تنه وژل شوي و چې په هغې ډله کې د کانونو وزارت درې تنه کارکوونکي چې یو یې د دغه وزارت د ارزونې د کمېسیون د غړي زوی هم و، دا رنګه دوه وسلهوال طالبان او درې ماشومان هم د وژل شویو کسانو په ډله کې وو.
لوړپوړو طالب چارواکو له هغې ډلې د دفاع وزیر او د طالبانو لوی درستیز په وار، وار ویلي، چې د افغانستان هوايي حریم لا هم د امریکا په «واک» کې دی.
