د طالبانو د سوداګرۍ وزیر وايي، د دې ډلې د اقتصادي تګلارې له امله د افغانستان تولیدات د منځنۍ اسیا په هېوادونو کې ښه بازار لري. نورالدين عزيز ویلي، له ګاونډيو سره ښې سوداګريزې اړيکې د دې لامل شوې، چې افغانستان کې بیې ثابتې پاتې شي او د لارو تړل کېدل د توکو پر بيو اغېز و نه کړي.
د طالبانو د سوداګرۍ وزیر د ریاست الوزرا له سیاسي مرستیال مولوي عبدالکبیر سره په کتنه کې ادعا کړې ده، چې ددغې ډلې د ښه اقتصادي سیاست له امله د سیمې له هېوادونو سره د صادراتو او وارداتو کچه زیاته شوې ده.
دا په داسې حال کمې ده، چې د طالبانو د صنایعو او سوداګرۍ وزارت د ۱۴۰۳ کال د وري میاشتې په پیل کې اعلان وکړ، چې په ۱۴۰۲ کال کې د افغانستان صادرات تر تېر کال شپږ سلنه کم شوی دی.
ارګ په خبرپاڼه کې ویلي، چې مولوي عبدالکبیر د صنعت او سوداګرۍ وزارت هڅې وستایلې او زیاته یې کړه، چې د طالبانو هڅې او پولي ثبات د دې لامل شوی چې په افغانستان کې د لومړنیو توکو بیې په "مناسب" حالت کې پاتې شي.
نوموړي له ګاونډیو هېوادونو سره د سوداګرۍ په برخه کې د انډول پر ساتلو ټینګار وکړ او ویې وېل، چې د کورنیو تولیداتو د غوره کیفیت، د صنعت د ودي او پراختیا لپاره دې لا زیاتي هڅې وشي.
