د روزګان ځايي طالب چارواکي: د ورستیو سېلابونو له امله ۱۲ کسان مړه شوي دي
په روزګان کې ځايي طالب چارواکي وايي، د ورستیو سېلابونو له امله ۱۲ کسان مړه او شپږ ټپیان شوي دي. په روزګان کې لا هم د یوشمېر ولسوالیو لارې د تګ راتګ پر مخ بندې دي.
په روزګان کې ځايي طالب چارواکي وايي، د ورستیو سېلابونو له امله ۱۲ کسان مړه او شپږ ټپیان شوي دي. په روزګان کې لا هم د یوشمېر ولسوالیو لارې د تګ راتګ پر مخ بندې دي.
په روزګان کې د طالبانو د والي ویاند وايي، د ورستیو سېلابونو له امله ۱۲ کسان مړه شوي او شپږ کسان ټپیان شوي دي.
اغاولي انعام وايي، د ورستیو سېلابونو د ځاني زیانونو تر څنګ ډېر مالي زیانونه هم اړولي دي.نوموړی وايي، د سېلابونو له امله لس زره جریبه ځمکه د سېلابونو اوبو لاندې کړې ده چې ډېره برخه یې کرنیزه وه.د طالبانو تر واک لاندې ملي ټلویزیون له لوري په خپاره شوي غږیز پیغام کې نوموړی وايي، په یادو سېلابونو کې لسګونه کورونه او دوکانونه هم ویجاړ شوي دي.اغاولي انعام وايي، سېلابونو تر ډېره په چوره، دهراوود، خاص روزګان او مرکز ترینکوټ کې ډېر زیانونه اړولي دي.د نوموړي په خبره د ځینو سیمو لارې اوس هم د تګ راتګ لپاره بندې دي او ډېری پلونه او پلچکونه ویجاړ شوي دي.ښاغلی انعام وايي، سېلاب ځپلي کسانو ته تر اوسه د اوسېدو کوم ځانګړی ځای نه دی په نښه شوی او ټول سېلاب ځپلي کسان په سیمه کې د خپلو خپلوانو په کورونو کې اوسېږي.دا په داسې حال کې ده، چې دوه ورځې وړاندې د طالبانو د رییس الوزرا د اقتصادي چارو مرستیال ملا عبدالغني برادر روزګان ولایت ته د سېلاب ځپلو کسانو سره د مرستې په موخه هم سفر کړی و.
