په کراچۍ کې د طالبانو د کونسلګرۍ سرپرست عبدالجبار تخاري وايي، په کراچۍ کې د افغان ملي بانک ځمکې نیول شوې دي. د هغه په وينا، د بهرنيو چارو وزارت او د پاکستان پوليسو د دغو جايدادونو په بېرته نيولو کې له دوى سره همکاري نه ده کړې.
په کراچۍ کې د طالبانو کونسلګرۍ د چهارشنبې په ورځ پر ایکس پاڼه لیکلي چې تخاري په کراچۍ کې د پاکستان د بهرنیو چارو وزارت له استازو سره وکتل.
د طالبانو په خبرپاڼه کې راغلي: «د کونسلګرۍ سرپرست زیاتوي چې یو لړ رسمي چارې چې جنرال کونسل پخوا بهرنیو چارو وزارت ته استولې وې، تر اوسه پورې حل شوې نه دي او دغه وزارت له موږ سره همکاري نه ده کړې.»
دغې استاولۍ زیاته کړې چې د کراچۍ په مهمو ځایونو کې د افغان ملي بانک دوه حویلۍ له ډېرې مودې راهیسې نیول شوې دي.
د طالبانو دغه استازی وايي چې دوی «په سوله ییزه توګه د بانکونو په ملکیتونو کې یو شمیر افغانان ځای په ځای کړل.» خو «یو لوی شمېر غیر مسوول وسله وال راغلل په ملکیتونو باندې ننوتل او اوسیدونکي یې په زور وشړل.»
د طالبانو استازی وايي چې پوليسو د دغو وسله والو په شړلو کې همکاري نه ده کړې.
