موسمي طوفاني بارانونو په بلوچستان ویجاړی رامنځته کړی دی
د سختو بارانونو او سېلابونو له امله په بلوچستان کې یو شمېر عامه ځایونه ړنګ شوي، سلګونه کورونه ویجاړ شوي او د ځینو کلو اړیکه له ښار سره پرې شوې ده.
د سختو بارانونو او سېلابونو له امله په بلوچستان کې یو شمېر عامه ځایونه ړنګ شوي، سلګونه کورونه ویجاړ شوي او د ځینو کلو اړیکه له ښار سره پرې شوې ده.
جیو نیوز د چهارشنبې په ورځ ( وري۲۹مه)راپور ورکړی چې ګوادر، پسني، اورماره او جيوني کې د سختو بارانونو له امله ګڼ کورونه ړنګ شوي او استوګن کورونه د اوبو لاندې شوي دي.
د طوفاني بادونو له امله د کورونو سولر تختې هم راپرېوتې، له بارانونو وروسته له غرونو څخه د راوتلو سېلابونو له امله هم زيانونه اوښتي، ځیني سړکونه وران شوي او څو کلیو سره ځمکنۍ اړیکه هم پرې شوې ده.
د قلات او هرنایي په ګډون مرکزي بلوچستان کې بارانونه دوام لري.
شمالي بلوچستان چمن او نورو سیمو کې هم د خلیج څخه د راغلو موسمي نظام له امله د طوفاني بارانونو لړۍ روانه ده.
د پاکستان هوا پیژندنې ادارې ویلي، چي بلوچستان کې د بارانونو لړۍ دوام لري او سبا به هم بارانونه کیږي.
بل خوا د خېبرپښتونخوا په پاړه چنار کې هم د سختو بارانونو له امله په مختلفو سیمو کې د خټو کورونه نړېدلي دي.
په کرم سیند کې د سیلاب له امله د سیند د غاړې کرنیزې ځمکې د اوبو لاندې شوې دي.
