که څه هم تر اوسه پورې په رسمي ډول طالبانو نه دي ويلي چې غزني کې د ازادۍ رادیو خبریال حبیب الرحمان تاثیر دوی نیولی خو د دغې ډلې د اسختباراتو اړوند رسنۍ وايي چې دغه خبریال طالب وسله والو «اسلامي ارزښتونو ته د سپکاوي په تور نیولی.»
تېره ورځ چهار شنبه رسنیو خبر ورکړی چې طالبانو حبیب الرحمان تاثیر ۱۲ ورځې وړاندې په غزني کې نیولی.
د افغانستان د خبریالانو مرکز هم له طالبانو غوښتي چې د ازادي راډیو خبریال دې پرته له کوم قید او شرطه خوشې کړي.
دغه مرکز په یوې اعلامیه کې لیکلي، چې د طالبانو د استخباراتو ادارې ښاغلی تاثیر د وري په ۱۸مه، په غزني کې نیولی او بندي کړی دی.
د طالبانو د استخباراتو اړوند د هندوکش په نوم یوې ویب پاڼې پرون په یوه خپاره شوي راپور کې ویلي، چې حبیب الرحمان تاثیر یې «اسلامي ارزښتونو ته د سپکاوي په تور نیولی او پوښتنې ګرویږنې ترې روانې دي.»
د طالبانو دغې رسنۍ ادعا کړې چې د دغه خبریال اړوند یو غږیز کليپ یې ترلاسه چې نوموړی، «ملا، جومات او لمونځ کوونکو ته سپکې سپورې وايي.»
دغه رسنۍ په خپل راپور کې وايي، چې د حبیب الرحمان تاثیر نیول کېدل د ده له خبریالۍ سره تړاو نه لري.
دا لا نه ده معلومه چې د ازادۍ راډیو دغه خبریال ولې نیول شوی خو د هغه کورنۍ وايي چې له تېرو ۱۲ ورځو راهیسې له طالبانو سره په زندان کې دی او د نیول کېدو د لامل په اړه یې نه پوهیږي.
د افغانستان د خبریالانو مرکز د چهارشنبې په ورځ (د وري ۲۹مه) په خپله خبرپاڼه کې د دغه خبریال نیول کېدل غندلي دي.
دغه مرکز د سرچینو په حواله ویلي چې د طالبانو د استخباراتو کارکونکو د ښاغلي تاثیر د نیولو پر مهال د هغه ټیلیفون په ګډون د هغه ټول توکي ضبط کړي دي.
دغه مرکز په غزني کې د یوې ځايي سرچینې له خولې لیکلي، چې ښاغلی تاثیر درې ورځې وړاندې د طالبانو د استخباراتي برخې زندان ته لېږدول شوی او دوسیه یې د دغې ډلې محکمې ته استول شوې ده.
د ازادي راډیو مرکزي دفتر په چک جمهوریت کې دی او له هغه ځایه د افغانستان لپاره خپرونې کوي.
د ۱۴۰۱کال د لېندۍ په میاشت کې طالبانو د «طالبانو پر ضد د پروپاګند» له امله د دغې رسنۍ راډیویي خپرونې او دوه میاشتې وروسته یې پسې ویب پاڼه هم بنده کړه.
