د ایران د اسلامي جمهوریت د لښکر یو قوماندان عبدالرحمان ساسانیان اعلان کړی، چې د پوځ سرتېري یې د ایران او افغانستان ترمنځ د پولې پر بندولو بوخت دي. ښاغلي ساسانیان وویل، چې د ایران او افغانستان په سرحدي برخو کې د دغې پروژې لپاره ټولې اړینې بنسټیزې چارې برابرې شوې دي.
د اېرنا خبري اژانس د پنجشنبې په ورځ (د وري ۳۰مه) راپور ورکړی، چې عبدالرحمان ساسانیان د ایران او افغانستان ترمنځ د پولې بندولو طرحه تر ټوله «اړینه» پروژه ګڼلې.
د دغه ایراني چارواکي د څرګندونو پربنسټ، دغه طرحه د دغه هېواد د ځمکنیو ځواکونو د انجنیرانو لهخوا د پلې کېدو په حال کې ده.
د اېرنا په راپور کې راغلي، د ۱۴۰۲ کال د سلواغې په میاشت کې د ایراني پوځ د ځمکنیو ځواکونو قوماندان کیومرث حیدری ویلي و، چې «په پوله کې د پوځي ځواکونو شتهوالی د ناامنیو په مانا نه دی؛ بلکې د اطلاعاتي او پوځي چمتوالي په موخه دا چاره اړینه ده.»
د طالبانو ویاند ذبیحالله مجاهد د ۱۴۰۲ کال د سلواغې په میاشت کې ویلي و، چې د ایران او افغانستان تر منځ پوله باید د دواړو خواوو په تفاهم بنده شي.
د ۱۴۰۰ کال د زمري په میاشت کې کله چې طالبان واک ته ورسېدل، د دغې ډلې ځواکونه څو، څو ځلې د ایراني پوله ساتو سره په وسلهوالو نښتو کې ښکېل شوي دي.
