له هراته سیمهییزو سرچېنو افغانستان انټرنشنل ته وویل، دغه پېښه د هرات په زندهجان ولسوالۍ کې شوې چې له امله یې یو تن ماشوم ځای پر ځای مړ شوی او څلور تنه نور یې ټپیان شوي دي.
سرچېنې وویل، پېښه پرون پنجشنبه د (وري ۳۰ مه) د زندهجان ولسوالۍ په «قلعه رېګ» سیمه کې هغه مهال شوې چې ماشومانو د یوه پخواني ماین له پاتې شونو سره لوبې کولې.
دغې سرچېنې وویل، چې ټپیان په بېړه روغتون ته رسول شوي او د درېیو هغو یې روغتیايي حالت د اندېښنې وړ ښودل شوی.
د افغانستان د خاورې ډېره برخه د تېرو شاوخوا درې لسیزو جګړو په ترڅ کې په ماینونو ککړه شوې او د جکړهيیزو توکو پاتې شوني هره ورځ د دغه هېواد خلکو په تېره بیا ماشومانو ته مرګ ژوبله اړوي.
که څه هم چې دا مهال په افغانستان کې یو شمېر ادارې د ماین پاکولو په چارو بوختې دي؛ خو خلک وايي د دغه پټ دښمن د زیانونو په اړه خلکو ته لازم پوهاوی نه دی ورکړل شوی.
دغه خلک وايي، ملګرو ملتونو ته په کار دي چې د افغانستان د ښونځیو او نورو ورته پروګرامونو له لارې باید خلکو په تېره بیا ماشومانو ته اړین پوهاوی ورکړل شي.
