د طالبانو په واک کې د افغانستان بانک وايي، راتلونکې شنبه د افغانۍ د ارزښت ساتلو لپاره ۱۶ میلیونه ډالر لیلاموي.
دغه بانک نن په خپله اعلامیه کې وايي، په شرایطو برابر بانکونه او د پولي خدمتونو شرکتونه په دې بولۍ کې ګډون کولی شي.
د افغانستان بانک د اپرېل په لومړیو کې هم له یوې اونۍ په کم وخت کې ۳۲ میلیون ډالر لیلام کړل.
په ۲۰۲۱ کال کې د جمهوريت تر پرځېدو وروسته افغانیو خپل ارزښت په بې ساري توګه له لاسه ورکړ او یوډالر له ۱۱۳ افغانیو سره برابر شو.
خو افغانستان ته د بشري مرستو په نوم د نغدو ډالري کڅو په رسېدو او د طالبانو له خوا لیلام یې د افغانۍ د ارزښت په لوړېدو کې مرسته وکړه.
طالبان د همدې نغدو ډالرو د لړۍ له پیلېدو را هیسې نږدې هره یا دوه اونۍ وروسته تر لسو میلیونو ډېر ډالر لیلاموي، چې ور سره ورځ تر بلې د افغانۍ ارزښت زیاتېږي.