طالبان وایي،خبریال حبیب الرحمان تاثیر یې د رسنیز فعالیت له امله نه، بلکې «مقدساتو» ته د سپکاوي په تور نیولی.
خو سرچینې وايي، د طالبانو استخباراتو ښاغلی تاثیر د رسنیز کار له امله نیولی او کله یې چې د هغه موبایل کې یو پیغام پیدا کړی، نو اوس د نوموړي د نیولو لامل همدا پیغام بولي.
له نږدې دوو اونیو راهیسې ښاغلی تاثیر له طالبانو سره بندي دی، خو لومړی ځل نن د غزني لپاره د طالبانو د اطلاعاتو فرهنګ رییس د هغه نیول تایید کړل.
حمدالله نثار په خپل اېکس کې حبیب الرحمان تاثیر «مقدساتو او ارزښتونو» ته په سپکاوي تورن کړی، خو نور وضاحت یې نه دی ور کړی.
له بلې خوا د طالبانو د استخباراتو اړوند د هندوکش په نوم یوې ویبپاڼې پرون د ښاغلي تاثیر یو غږیز کلپ خپور کړ، چې ښيي ښاغلی تاثیر له یوه ملا سره تر جنجال وروسته یو ملګري ته وټسپ پیغام کې هغه ته سپکې سپورې وايي.
یوې سرچینې افغانسان انټرنشنل ته وویل، چې ښاغلی تاثیر د ازادۍ راډیو د یوه راپور تر خپرېدو وروسته نیول شوی دی.
د دې سرچینې په خبره، د تاثیر د نیولو اصلي لامل د ازادۍ رادیو راپور دی، خو تر نیول کېدو وروسته چې د نوموړي په موبایل کې غږیز پیغام موندل شوی، نو اوس طالبان د ده نیول د همدې له امله بولي.
د طالبانو امنیتي ادارې د مدني او ټولنیزو فعالانو او خبریالانو تر نیولو وروسته د دوی د خواله رسنیو او وټسپ پیغامونه هم ګوري.
د دې ډلې له استخباراتو څو میاشتې مخکې خوشی شوی خبریال وايي، چې د ده په وټسپ کې یې ورته د ۲۰۲۲ کال پیغامونه هم را واړول او د ملامتولو لپاره یې ورته پلمه کړل.
د افغانستان د خبریالانو مرکز هم له طالبانو غوښتي، چې حبیب الرحمان تاثیر دې پرته له کوم قید او شرطه خوشی کړي.
د افغانستان د خبریالانو مرکز د یوې سرچینې په حواله خبر ورکړی، چې د طالبانو د استخباراتو کارکونکو د ښاغلي تاثیر د نیولو پر مهال د هغه د ټلیفون په ګډون د نوموړي ټول توکي ضبط کړي دي.
له تېرو دوه نیمو کلونو راهیسې لسګونه خبریالان په بېلابېلو پلمو د طالبانو له خوا نیول شوي، شکنجه شوي او ځینې خبریالان تراوسه پورې هم د طالبانو په بندخونو کې دي.