سیف د چېلډرن د پنحشنبې په ورځ د وري ۳۰مه په یوې خبرپاڼه کې لیکلي، چې له پاکستانه د راستنو شویو کډوالو نیمايي برخه ماشومان دي او دوی د خپلو کورنیو سره په تش لاس افغانستان ته راستانه شوي دي.
د دغه بنسټ لهخوا ترسره شوې نظر پوښتنه ښيي، چې ډېرو راستنو شویو کورنیو یوازې د یوې یا دوو میاشتو لپاره خواړه لرل.
د دغه بنسټ په خبرپاڼه کې دا رنګه راغلي، چې ځیني راستانه شویو کډوالو د خپلو خپلوانو په کورونو کې اړولي او هغوی هم اړ وتي، چې د خوړو د تر لاسه کولو لپاره پیسې پور کړي.
د سېف د چلډرن د موندنو له مخې، د راستنو شویو ماشومانو دوه پر درېیمه برخه یې په ښوونځیو کې نه دي شامل شوي.
ډېری دغه ماشومان په ښونځیو کې د داخلولو اړین اسناد هم نه لري.
په افغانستان کې د طالبانو لهخوا له شپږم ټولګي پورته پر نجونو لګول شوی بندیز هغه بله ستونزه ده، چې ستانه شوي کډوال ورسره مخامخ شوي دي.
تېر کال د پاکستان تر څنګ له ایرانه هم شاخوا ۶۰۰ زره کډوال افغانستان ته په جبری توګه ستانه کړل شوي، چې دا هم د طالبانو د حکومت لپاره یوه ستره ننګونه ده.
بله خوا پاکستاني چارواکو هم تېره اونۍ د افغان کډوالو د ستنولو د دویم پړاو د پیلېدا خبرداری ورکړ.
د نړۍوالو ادارو شمېرې ښيي، چې دا مهال شاوخوا ۲.۱۸ مېلیونه افغان کډوال په پاکستان کې د اوسېدو اسناد لري چې له ډلې یې ۱.۳ مېلیونه یې د راجستریشن کارټونه (پي او ار) او ۸۸۰ زره نور یې په پاکستان کې د لنډ مهاله اوسېدنې (اې سي سي) کارټونه لري.
دا پلا پاکستان ویلي، چې د (پي او ار) کارټ لرونکي کډوال به له خپلې خاورې باسي، دغې نوې پرېکړې ته ګڼو نړۍوالو ادارو او بنسټونو غبرګون ښودلی او له پاکستانه یې غوښتي، چې له خپلې دغې پرېکړې په شا شي.
تېر کال پاکستاني چارواکو د بې اسناده کډوالو په نوم له پنځه لکو زیات افغان کډوال خپل هېواد ته ستانه کړل، چې لا هم هلته د ژوند تېرولو لازمې اسانتیاوې نه لري؛ که له یوې خوا هلته کار او روزګار نه شته، له بل پلوه دوی هلته نه د استوګنې لپاره ځای ځایګی لري او نه یې د ماشومانو د زدهکړو لپاره امکانات شته.
