د طالبانو د سټنډرډ ملي اداره وایي، چې د شیخ ابو نصر فراهي بندر له لارې یې ۲۲ ټانکره بې کیفیته تېل بېرته ایران ته ګرځولي. دغې ادارې په اېکس پاڼه لیکلي:« د شیخ ابو نصر فراهي بندر له لارې ۲۲ ټانکره تېل چې کیفیت یې د سټنډرډونو سره په ټکر کې و، هېواد ته یې د راتګ مخه ونیول شوه.»
دغې ادارې له ټولو سوداګرو غوښتي، چې هېواد ته د بې کیفیته نفتي توکو له راوړلو ډډه وکړي.
تر دې وړاندې د ایران او افغانستان د سوداګرۍ خونې مشر محمود سیادت له افغانستانه د ایران د تېلو د ورستنېدو په غبرګون کې ویلي و، چې طالبان په دې برخه کې مناسب لابراتوار او کارپوهان نه لري.
نوموړي زیاته کړې وه، چې د تېلو د کیفیت په معلومولو کې د طالبانو وړتیا کمه ده او په ازموینو کې یې د نیمګړتیاوو او تېروتنو احتمال شته.
د طالبانو د سټنډرډ ملي ادارې بیا د ایران او افغانستان د سوداګرۍ خونې د مشر د څرګندونو په غبرګون کې ویلي و، چې دغه هېواد دې د بې ځایه او بې بنسټه نیوکو پر ځای د خپلو توکو کیفیت ته پام وکړي.
