طالبانو ۱۰ موسسو سره د څه باندې یو میلیون ډالرو په ارزښت د همکاریو هوکړه لیکونه لاسلیک کړل
د طالبانو د صنعت او سوداګرۍ وزارت د تشبثاتو په برخه کې د یو میلیون او ۳۰۰ زره او ۷۶ ډالرو په ارزښت له لسو موسسو سره د همکاریو هوکړه لیکونه لاسلیک کړل.
د طالبانو د صنعت او سوداګرۍ وزارت د تشبثاتو په برخه کې د یو میلیون او ۳۰۰ زره او ۷۶ ډالرو په ارزښت له لسو موسسو سره د همکاریو هوکړه لیکونه لاسلیک کړل.
دغه وزارت د پنجشنبې په ورځ (د وري ۳۰مه) د یوې خبرپاڼې په خپرولو سره ویلي، چې دغه هوکړې به د کوچنيو او منځنيو تشبثاتو د پراختیا لامل شي.
د خبرپاڼې له مخې، دغه پروژې به په کابل، بغلان، غور، هرات، لوګر، ننګرهار، بلخ، بدخشان او جوزجان ولایتونو کې پلې شي.
د طالبانو د صنعت او سوداګرۍ وزارت دغه راز زیاته کړې ده، چې ددغو پروژو په پلې کولو سره به شاوخوا زرو کسانو ته د کار زمینې برابرې شي.
یاد وزارت وایي، چې له ملي او نړۍوالو بنسټونو سره یې د کوچنیو او منځنیو تشبثاتو د ودې، د مالي او تخنيکي ملاتړ، د خدمتونو د وړاندې کولو او پراختيا، د متشبثو کورنیو د ظرفیت د لوړولو، د عاید او کار پیدا کولو او د لاسي صنایعو د مهارتونو د لوړولو په برخو کې د همکاريو ٧٢ تړونونه لاسليک کړي دي.
په دغو پروژو کې کډوالو او بې ځایه شویو کورنیو ته لومړیتوب ورکړل شوی او د هېواد په ۲۵ ولایتونو کې به زرګونو کسان ترې ګټه واخلي.
