د جمهوري غوښتونکو تر کنټرول لاندې د متحده ایالاتو د استازو مجلس د شنبې په ورځ د ۹۶ ملیارد ډالرو په ارزښت د اوکراین، اسراییل او ټایوان له پاره د امنیتي مرستو کڅوړې ته رایه ورکوي، او تمه کیږي چې دغه مرستې تصویب کړي.
د مرستو دغه کڅوړه څه باندې دوه میاشتې وړاندې د امریکا د سنا مجلس له خوا تصویب شوې وه.
د امریکا ولسمشر جو بایډن او د سنا مجلس د لږکیو مشر میچ مککونل، په پرله پسې توګه د استازو مجلس له مشر مایک جانسن نه غوښتنه کوله چې دغه مرستې رای اچونې ته وړاندې کړي. د امریکا د سنا مجلس د ډیموکراټانو تر کنټرول لاندې دی.
دغه مرستې د استازو په مجلس کې ځکه رای اچونې ته نه وړاندې کیدې، چې د دغې مجلس ځینو سخت دریځو غړو د مرستو له تصویب سره مخالفت کاوه او غوښتل یې، چې دغه پیسې د امریکا د سرحدونو د امنیت او ځینو نورو چارو له پاره ولګول شي.
جانسن پدې اونۍ کې د سخت دریځو غړو پر ګواښونو سترګې پټې کړي او دغه مرستې یې د رای اچونې له پاره وړاندې کوي. په دغو مرستو کې ۶۰.۸۴ میلیارده ډالر یې اوکراین ته ورکول کیږي، چې اوسمهال د روسیې د دوه کلن یرغل سره د مبارزې په برخه کې له ستونزه سره مخامخ دی.
په همدې کڅوړه کې د اسراییل، ټایوان او ارام سمندرګي کې د متحدینو لپاره مرستې هم شاملې دي. په همدې حال کې په یادې کڅوړه کې په امریکا کې پر چینايي ټولنیزې شبکې ټیک ټاک بندیز لګول او اوکراین ته د روسیې د ضبط شوو شتمنیو احتمالي لیږد هم شامل دی.
