په ننګرهار ولایت کې د طالبانو د رسنیو مرکز وایي، چې په دغه ولایت کې په دوو جلا پېښو کې ورښتونو یو ماشوم مړ کړی او دوه تنه یې ټپیان کړي دي. دغه مرکز په اېکس پاڼه لیکلي، چې د ننګرهار ولایت د بټي کوټ د لوړتۍ تکيې سيمه کې د یوه کور د خونې چت پرېوتو له امله يو ماشوم مړ شوی دی.
د دغه مرکز په وینا، په یوې بلې جلا پېښه کې بیا د بټي کوټ د سپين خوړ سيمه کې د یوه کور د خونې چت پرېوتو په پېښه کې دوه کسان ټپيان شوي دي.
په دغې لیکنه کې راغلي، چې د کوټ ولسوالۍ سيد احمد خېلو، کوچيانو، غازي اباد فارم قصبې، دروېشتمې ويالې نواکلو، کوز باريکاب او حيدر خانې کې يوشمېر کورونه نړېدلي؛ خو په وینا یې چې په دغو پېښو کې چاته زيان نه دی اوښتی.
په ننګرهار ولایت کې د طالبانو د رسنیو مرکز همدارنګه ویلي، چې سپين غر ولسوالۍ کې ورښتونو مالي زيانونه اړولي؛ خو لا یې کره معلومات په لاس کې نشته.
د دوی په خبره، په دغو ورښتونو کې ډېری څاروي هم تلف شوي؛ خو د شمېرو په اړه یې څه نه دي ویلي.
دغه مرکز زیاته کړې، چې یوازې په اچین ولسوالۍ کې وروستیو ورښتونو ۴۱ کورونه نړولي دي.
