په کندهار کې ځايي سرچېنو افغانستان انټرنشنل ته منلې چې بیګا شپه یو ځلې بیا بې پیلوټه الوتکو د کندهار پر فضا الوتنې کړې دي. دغو سرچېنو ویلي چې له پرون سهار راهیسې بیا بیګا شپه د کندهار پر اسمان بې پیلوټه الوتکې لیدل شوې چې په پرله پسې توګه یې الوتنې کولې.
تر اوسه پورې طالبانو په دې تړاو څه نه دي ویلي او دا هم روښانه نه ده چې دغه بې پیلوټه الوتکې د کوم هېواد دي.
تر دې وړاندې د افغانستان پر نورو ولایتونو لکه پکتیکا، کونړ، بدخشان، پنجشیر، نیمروز او هرات ولایتونو کې هم سرچینو د بې پیلوټه الوتکو د الوتنو خبره کړې وه.که څه هم چې طالبان په دې برخه کې له څه ویلو ډډه کوي، خو یو ځل د دغې ډلې ویاند ذبیح الله مجاهد د کندهار ولایت پر فضا د بې پیلوټه الوتکو خبره منلې وه او هغه یې د افغانستان پر هوايي حریم بربنډ تیری بللی و.تر هغه وړاندې د طالبانو د دفاع وزیر او د دغې ډلې لوی درستیز هم ویلي و چې د افغانستان هوايي حریم لا هم د دوی په وینا د نورو په واک کې دی.څو اونۍ وړاندې چې کله پر کندهار د بې پیلوټه الوتکو الوتنې ډېرې شوې، نو د طالبانو مشر ملاهبت الله خپل استوګنځای بدل کړ او د پنجوايي ولسوالۍ ته کوچېدلی و.
د طالبانو عدليې وزارت څه موده مخکې په ټول افغانستان کې پر سياسي فعاليت بنديز ولګاوه.
افغانستان انټرنشنل ـ پښتو ته د هلمند څخه ځينو سرچينو د دوشنبې په ورځ خبر ورکړ، چې د طالبانو استخباراتو د هلمند د بست ټولنې مشر عبدالغفار اسحاقزي پر کور عملیات کړي او هغه يې له دوو زامنو سره نيولی او بندي کړی دی.
سرچینه زياتوي، چې اسحاقزي د تېر جمهوري نظام پر مهال په هلمند کې د بست ټولنې مشر او د هلمند څخه د مشورتي لویې جرګې غړی و.
د سرچينو په خبره، چې د طالبانو استخباراتو د لښکرګاه ښار د اتمې حوزې اړوند په لښکري بازار کې د هغه پر کور عملیات کړي دي.
که څه هم د هغه کورنۍ د طالبانو له ويري له رسنيو سره جزیيات نه شریکوي؛ خو د هغه نږدې ملګري وايي، چې طالبانو په زندان کې اسحاقزی او د رفيع الله په نوم د هغه يوه زوی سخت وهلي او شکنجه کړي دي او د نوموړي دویم زوی یې تر دوو ورځو بند وروسته خوشې کړی دی.
د معلوماتو له مخې؛ واک ته د طالبانو په رسېدو اسحاقزي له سياسي فعاليته لاس اخيستی او ازاد کاروبار يې مخ ته وړه.
د هلمند طالبانو په دې اړه تر اوسه څه نه دي ويلي.
د طالبانو د عدليې وزارت ویاند قاري برکت الله رسولي څه موده مخکي په يوه ويډيي پيغام کې افغانانو ته خبرداری ورکړی و، چې که چا سياسي فعالیت وکړ له سخت قانوني چلند سره به مخ شي.
هغه ويلي وو، چې اوس مهال يوازي خيريه بنسټونه فعالیت کولای شي.
د طالبانو عدليې وزارت ويلي، چې دوی په تېر ۱۴۰۲ کال کې دوه سياسي ګوندونه او ۷۵ ټولنې او خيريه بنستونه د «غيرې قانوني» فعاليتونو له امله امنيتي ادارو ته ور پېژندلي دي.
د طالبانو سترې محکمې هم څو ورځي مخکي خبر ورکړ، چې په کندهار کې يې په لومړي ځل دوه کسان د سیاسي فعالیت په تور په ۱۵ - ۱۵ کاله بند محکوم او یو بل کس یې د سیاسي فعالیت له امله ۳۰ دورې وواهه.
د ښځو پر زده کړو او کار کولو بندیزونه، پر رسنیو پراخ محدودیتونه، د تعلیمي نظام بدلول، په هیواد دننه بهرنیو ترهګرو ته ځای ورکول، د سياسي او ټولنيزو فعاليتونو بندول او داسې نور لسګونه موارد د دې لامل شوي، چې ددې ډلې پر وړاندې نړۍوال غبرګونونه ډېر شي