چین: د عینک مس په داسې ډول استخراجوو چې د افغانستان تاریخي ابدات زیانمن نه شي
په کابل کې د چین سفیر د طالبانو د اطلاعاتو او کلتور وزارت ته ډاډ ورکړی، چې د عینک د مسو پروژه به د فرهنګي کارونو له زیان پرته ترسره شي.
په کابل کې د چین سفیر د طالبانو د اطلاعاتو او کلتور وزارت ته ډاډ ورکړی، چې د عینک د مسو پروژه به د فرهنګي کارونو له زیان پرته ترسره شي.
د طالبانو تر کنټرول لاندې باختر خبري اژانس ویلي، چې ژاو شينګ له طالبانو سره د چين د فرهنګي او اقتصادي همکاريو پر دوام هم ټينګار کړى دى.
خبر ځای د طالبانو د اطلاعاتو او فرهنګ د وزير ملا خيرالله خيرخواه او په کابل کې د چين د سفير ژاو شينګ ترمنځ د کتنې په باب ليکلي دي.
خیرخواه د افغانستان او چین ترمنځ د فرهنګي اړیکو له پراختیا او پياوړتیا څخه خوښي څرګنده کړه او د ورېښمو لارې بیا رغونه یې په سیمه کې د کلتوري او اقتصادي اړیکو د پراختیا لپاره مهمه وبلله.
د طالبانو د اطلاعاتو او فرهنګ وزیر وویل، چې چین د یوه ښه ګاونډی په توګه د افغانستان ملي حاکمیت او ځمکنۍ بشپړتیا ته درناوی لري او تل یې له دغه هېواد سره د ښو اړیکو د ساتلو هڅه کړې ده.
دغه طالب چارواکي په افغانستان کې د چینايي سوداګرو لپاره د پانګونې او سوداګرۍ د ښه فرصتونو یادونه هم وکړه او زیاته یې کړه، چې طالبان د بهرنیو شرکتونو لپاره خوندي کاري چاپیریال برابروي.
د باختر اژانس د خبر له مخې؛ ژاو شينګ وويل، چې چين تل له افغانستان سره په پراخو برخو کې ډېپلوماتيکې اړيکې او همکارۍ ساتلې دي.
هغه زیاته کړه: "موږ به د عینک د مسو پروژه په داسې ډول پرمخ یوسو چې کلتوري کارونو ته زیان ونه رسیږي."
سفير په دې برخه کې د طالبانو د اطلاعاتو او فرهنګ وزارت د همکارۍ غوښتنه وکړه.
په تېرو دوو کلونو کې رسمي چارواکو او د عینک د مسو کان کیندنې شرکت په وار - وار د دغې پروژې د پیل ژمنې کړي؛ خو له کوم رسمي وضاحت پرته یې کار نه دی پیل کړی.
د عینک د مسو کان چې په افغانستان کې د مسو تر ټولو لوی کان او په نړۍ کې د مسو دویم لوی کان دی، چې تړون یې په ۲۰۰۸ کال کې د افغانستان او چینايي شرکت MCC ترمنځ لاسلیک شو.
دغه چینایي شرکت اوس د ۳۰ کلونو لپاره د عینک د مسو د استخراج ملکیت لري.
د طالبانو عدليې وزارت څه موده مخکې په ټول افغانستان کې پر سياسي فعاليت بنديز ولګاوه.
افغانستان انټرنشنل ـ پښتو ته د هلمند څخه ځينو سرچينو د دوشنبې په ورځ خبر ورکړ، چې د طالبانو استخباراتو د هلمند د بست ټولنې مشر عبدالغفار اسحاقزي پر کور عملیات کړي او هغه يې له دوو زامنو سره نيولی او بندي کړی دی.
سرچینه زياتوي، چې اسحاقزي د تېر جمهوري نظام پر مهال په هلمند کې د بست ټولنې مشر او د هلمند څخه د مشورتي لویې جرګې غړی و.
د سرچينو په خبره، چې د طالبانو استخباراتو د لښکرګاه ښار د اتمې حوزې اړوند په لښکري بازار کې د هغه پر کور عملیات کړي دي.
که څه هم د هغه کورنۍ د طالبانو له ويري له رسنيو سره جزیيات نه شریکوي؛ خو د هغه نږدې ملګري وايي، چې طالبانو په زندان کې اسحاقزی او د رفيع الله په نوم د هغه يوه زوی سخت وهلي او شکنجه کړي دي او د نوموړي دویم زوی یې تر دوو ورځو بند وروسته خوشې کړی دی.
د معلوماتو له مخې؛ واک ته د طالبانو په رسېدو اسحاقزي له سياسي فعاليته لاس اخيستی او ازاد کاروبار يې مخ ته وړه.
د هلمند طالبانو په دې اړه تر اوسه څه نه دي ويلي.
د طالبانو د عدليې وزارت ویاند قاري برکت الله رسولي څه موده مخکي په يوه ويډيي پيغام کې افغانانو ته خبرداری ورکړی و، چې که چا سياسي فعالیت وکړ له سخت قانوني چلند سره به مخ شي.
هغه ويلي وو، چې اوس مهال يوازي خيريه بنسټونه فعالیت کولای شي.
د طالبانو عدليې وزارت ويلي، چې دوی په تېر ۱۴۰۲ کال کې دوه سياسي ګوندونه او ۷۵ ټولنې او خيريه بنستونه د «غيرې قانوني» فعاليتونو له امله امنيتي ادارو ته ور پېژندلي دي.
د طالبانو سترې محکمې هم څو ورځي مخکي خبر ورکړ، چې په کندهار کې يې په لومړي ځل دوه کسان د سیاسي فعالیت په تور په ۱۵ - ۱۵ کاله بند محکوم او یو بل کس یې د سیاسي فعالیت له امله ۳۰ دورې وواهه.
د ښځو پر زده کړو او کار کولو بندیزونه، پر رسنیو پراخ محدودیتونه، د تعلیمي نظام بدلول، په هیواد دننه بهرنیو ترهګرو ته ځای ورکول، د سياسي او ټولنيزو فعاليتونو بندول او داسې نور لسګونه موارد د دې لامل شوي، چې ددې ډلې پر وړاندې نړۍوال غبرګونونه ډېر شي
که څه هم امریکا په رسمي ډول ویلي، چې دغه هېواد په افغانستان کې سفارت نه لري او د دوی غیر مقیم سفارت په دوحه کې موجود دی.
هغه یو ځل بیا ویلي دي، چې افغانستان تر اوسه په بشپړه توګه ازاده شوی نه دی او د هېواد فضا لا هم د امریکا په واک کې ده.
نوموړي د طالبانو له مشرتابه غوښتي، چې د بهرنیو ځواکونو د وتلو له فرصته په استفادې سره افغانستان باید د بهرنيو له اغېز او سلطې څخه فارغ او خپلواك کړي.
اسلامي حزب د یوې خبرپاڼې په خپرولو سره ویلي، چې د امریکا بې پیلوټه الوتکې اوس هم د افغانستان په اسمان کې ګرځي او د خپلې خوښې بریدونه کوي.
په خبرپاڼه کې د امریکا د ځانګړي استازي ټام وېسټ هغو څرګندونو ته اشاره شوې، چې په کانګرس کې یې ویلي وو: "د تروريزم ضد ځواك او اداره په افغانستان كې فعال او ځواكمن حضور لري او په دې ارتباط طالبان له موږ سره پر خپلو ژمنو عمل كوي."
حکمتیار ویلي دي، چې طالبان باید امریکا مجبوره کړي، چې په افغانستان کې له شرارت څخه لاس واخلي.
په خبرپاڼه کې دغه راز د حکمتیار له قوله لیکل شوي: "افغانان هیله لري چې مسوول او اسلامي نظام ولري؛ خو اوسنیو شرایطو ته په کتو سره داسې ښکاري، چې دغو هیلو ته د رسېدو لپاره ډېر ګواښونه او خنډونه شته."
د ګلبدین حکمتیار له خوا په افغانستان کې د امریکا په سفارت کې د ځینو اشخاصو د موجودیت په تړاو مساله په داسې مهال مطرح کیږي، چې طالبانو هم په بار - بار ویلي، چې په کابل کې د امریکا په سفارت کې څوک نه شته.
حکمتیار په دغه خبرپاڼه کې زیاته کړې ده، چې افغانانو د شوروي او امریکا په ماتولو سره فعاله ونډه درلوده او دوی باید د یوه ډاډمن محور په رامنځته کېدو سره راغونډ کړی شي.
د ګلبدین حکمتیار په مشرۍ اسلامي حزب دغه خبرپاڼه په داسې کې خپره کړې، چې په وروستیو میاشتو کې د طالبانو او اسلامي حزب ترمنځ ناندرۍ زیاتې شوې دي.
شهادت ورځپاڼه چې د اسلامي حزب رسمي ورځپاڼه ده، د ګلبدین حکمتیار دغه خبر پاڼه یې د طالبانو د درېیو مشرانو ملا هبت الله، ملا حسن اخوند او سراج الدین حقاني له عکسونو سره یو ځای خپره کړې ده.
طالبانو څه موده مخکې حکمتیار له هغه کور څخه و اېسته چې تېر حکومت د یوې هوکړې له مخې ورکړی و.
طالبانو ویلي، چې د حکمتیار د اوسېدو ځای دولتي ملکیت او ملي دفاع وزارت پورې اړوند دی.
طالبانو له دې اقدام وروسته اسلامي حزب پورې اړوند د بریا راډیو ټلویزیون نشرات هم بند کړل او د ګلبدین حکمتیار پر ناستو او لیدنو یې هم بندیز ولګولو.