امریکايي پولیسو د دغه هېواد په څلورو پوهنتونونو کې د فلسطین د ملاتړو محصلانو پر غونډو چاپه وهلې او تر ۲۰۰ ډېر محصلان یې نیولي دي. دغه کسان په سینټ لویس کې په واشنګټن پوهنتون، د اریزونا ایالتي پوهنتون، د انډیانا او بلومینګټن پوهنتون کې نیول شوي دي.
نيويارک ټايمز ورځپاڼې ليکلي، چې د امريکا په ډېرو برخو کې د پوهنتون چارواکي هڅه کوي، چې په دغو پوهنتونونو کې د غزې د جګړې د مخالفينو د زياتېدونکو ناستو او غونډو مخه ونيسي.
په ورته وخت کې د کولمبیا پوهنتون د نیویارک د پولیسو له څانګې څخه غوښتي، چې د فلسطین پلوه زده کونکو د ایستلو لپاره مداخله وکړي.
له هغه وخت راهیسې پولیسو د امریکا په پوهنتونونو کې تر ۷۰۰ ډېر مظاهره کوونکي نیولي او په یو شمېر مواردو کې یې ډېری بېرته خوشې کړي دي.
په سینټ لویس کې د واشنګټن پوهنتون په یوه بیان کې د پوهنتون د تړلو اعلان وکړ او ویې ویل، چې د پوهنتون په احاطه کې تر ۸۰ زیات کسان نیول شوي دي.
په نیول شویو کسانو کې د امریکا د ۲۰۲۴ کال د ولسمشرۍ په انتخاباتو کې د زرغون ګوند د کاندیدې جېل سټاین او د هغې د انتخاباتي کمپاین دوه غړي هم شامل دي.
تېر کال د اکټوبر پر ۱۵مه د اسراییل پر جنوبي سیمو د حماس وسله والو برید وکړ، چې په پایله کې یې د یرغمل تر څنګ ۱۲۰۰ اسراییلیان ووژل شول.
ورپسې اسراییل پر غزې برید وکړ، چې د حماس د روغتیا وزارت د معلوماتو له مخې؛ د غزې د جګړې له پیل راهیسې تر اوسه په دې سیمه کې څه باندې ۳۴ زره فلسطینیان وژل شوي او څه باندې ۷۷ زره نور ټپیان شوي دي.
