د سکاټلنډ لومړي وزیر حمزه یوسف له یو کال او یوې میاشت دندې وروسته استعفا وکړه. دغه پاکستاني نژاد سیاستوال تېره اوونۍ له شنه ګوند سره د سکاټلنډ ملي ګوند ایتلافي حکومت نسکور کړ او د روانې اوونۍ په پای کې به پارلمان کې د نه باور له رایې سره مخامخ شي.
ښاغلي یوسف د دوشنبې په ورځ د غويي په لسمه په یوه خبري غونډه کې د سکاټلنډ د ملي ګوند له مشر او د سکاټلنډ د لومړي وزیر له څوکۍ خپله استعفا اعلان کړه.
هغه وویل تر څو چې بل څوک نه وي ټاکل شوی تر هغه به خپلې دندې ته دوام ورکړي.
تېره اونۍ حمزه یوسف د خپل ګوند او سکاټلنډ شنه تر منځ واکمن ایتلاف ختم کړ.
دا احتمال چې ښاغلی یوسف به د سکاټلنډ په پارلمان کې د نه باور په رایه کې بریالی شي، ډېر کم و.
ښاغلي یوسف وویل:" زه چمتو نه یم چې د خپلو ارزښتونو او اصولو تجارت وکړم او یا یوازې د واک د ساتلو لپاره له یو چا سره تجارت وکړم."
حمزه یوسف د تېر کال په مارچ میاشت کې د نیکولا سټرجن له استعفا وروسته واک ته ورسید.
نوموړی پاکستانی نژاد دی او له یوولسو کلونو راهیسې په سکاټلینډ کې په سیاست کې ښکیل دی.
د سکاټلنډ ملي ګوند له انګلستان څخه د خپلواکۍ غوښتونکي دي.
