د پاکستان د دفاع وزير او د ترکيې د ځمکنيو ځواکونو قومندان په ليدنه کې د دوه اړخيزو دفاعي همکاريو د لا پراخوالي ژمنه وکړه. خواجه محمد اصف له ترکیې جنرال سیلکوک بایراکتراوغلو سره د دواړو هېوادو د ځواکونو ترمنځ د اړيکو پر قوي کېدو هم خبرې کړې دي.
د پاکستان راډيو وايي، دغو دوو پوځي چارواکو په اسلام اباد کې سره ولیدل.
راډيو په خپل خبر کې د خواجه اصف له قوله زياتوي، چې نوموړي د دفاعي هکاريو زياتول د دوه اړخيزو اړیکو یو مهم اړخ بللی او ويلي يې دي، چې ګډ پوځي تمرينونه او پوځي روزنه پکې شامله ده.
د پاکستان په پلازمېنه اسلام اباد کې ګڼو خبریالانو او د خبریالانو ټولنو په یوه خوله پر پاکستاني چارواکو غږ کړی، چې دغلته دې د مېشتو افغان کډوالو خبریالانو لاسنیوی وکړي او د هغوی په خوندیتوب کې دې له هیڅ راز مرستې او همکارۍ ډډه نه کوي.
دغو خبریالانو او بنسټونو پرون دوشنبه د (غويي ۱۱مه) په اسلام اباد کې جوړې شوې غونډې ته وویل، هغه افغان کډوال چې په افغانستان کې د طالبانو له واکمنېدو وروسته پاکستان ته کډه شوي په بد اقتصادي او امنیتي وضعیت کې ژوند کوي او د نړۍوالې ټولنې مرستې او همکارۍ ته سترګې په لار دي.
ویناوالو وویل، دغه خبریالان چې نورو هېوادونو ته د تګ لپاره په تمه دي د سخت اقتصادي وضعیت او په پاکستان کې د پولیسو د ځورولو سره مخامخ دي.
دوی ویل، چې د ګڼو خبریالانو د ویزو موده ختمه شوې او د جبري شړلو سره مخامخ دي.
هغوی په خپلو خبرو کې زیاته کړه، که هر یو خبریال له دغه هېواده ایستل کېږي؛ نو د طالبانو له ګواښونو او ان د وژلو سره مخامخ کېدای شي.
ویناوالو له نړۍوالې ټولنې وغوښتل، چې د دغو خبریالانو په اېستلو کې دې پاملرنه وکړي او د هغوی د کډوالۍ د غوښتنلیکونو بهیر دې چټک کړي.
کله چې په ۲۰۲۱ کال کې طالبانو پر افغانستان واګې ټینګې کړې؛ نو ګڼو خبریالانو د ځان خوندي کولو په موخه پاکستان ته مخه کړه او دغلته د سختو شپو ورځو په تېرولو سره یې شاوخوا دوه کاله تېر کړل.
د ځینو شمېرو له مخې، لا هم شاوخوا ۲۰۰ افغان خبریالان د خپلو کورنیو سره د پاکستان په بېلابېلو ښارونو کې بې برخلیکه پراته دي او هره ګړۍ په زوره له دغه هېواده د شړلو او ځورولو سره مخامخ دي.
راپور کې راغلي، چې دغه افغان خبریالان تر ډېره بې کاره دي او د پاکستان د ویزو د نه درلودو په ګډون ګڼې ټولنیزې او اقتصادي ستونزې لري.
د پاکستان د پارلمان غړی او د تحریک انصاف ګوند مشر ګوهر خان وايي، چې که دوی د خپلو حقونو لپاره غږ پورته کوي؛ د پاکستان یو شمېر ادارات یې پر وړاندې قضیې جوړوي او دوی له ستونزو سره مخ کوي.
نوموړي د کومې ځانګړې ادارې نوم نه دی اخیستی؛ خو له دې وړاندې د عمران خان په ګډون د تحریک انصاف ګڼو مشرانو د پاکستان پوځ او استخباراتي ادارې تورنې کړې وې، چې په سیاسي چارو کې مداخله کوي.
ګوهر خان نن په اسلام اباد کې یوې خبري غونډې ته ویلي، چې د پاکستان ادارې دې په ځان کې بدلون راولي او د دې پر ځای چې په دوی پسې قضیې جوړې کړي؛ ښه به دا وي، چې مجرمانو ته سزاوې ورکړي.
نوموړي ویلي، چې د ګوند د غړو اړوند اکثره جوړې شوې قضیې په عدلي ارګانونو کې دوی ګټلې دي.
ګوهر خان زیاته کړې ده، چې د پاکستان په قانون کې د مرستیال لومړي وزیر چوکۍ نه شته؛ خو د پاکستان ولسمشر په خپل سر د مرستیال لومړي وزیر چوکۍ جوړه کړې ده.
وروسته له هغې چې د شهباز شریف په مشرۍ د عمران خان د حکومت پر وړاندې ایتلاف جوړ شو او د هغه حکومت یې را وپرځاوه، د تحریک انصاف ګوند ګڼ غړي په یو شمېر قضایاو کې زندان ته ولېږل شول.
د دغه ګوند مشر عمران خان او مرستیال شاه محمود قریشي لا هم په زندان کې دي او د ټاکنو په تړاو یې نا اهله اعلان کړي دي.
د پاکستان لومړي وزير شهباز شريف ويلي، چې د پاكستان او سعودي عربستان په اقتصادي اړیکو کې یو نوي فصل پیل شوی او د دواړو هېوادونو ترمنځ د تجارت حجم د پام وړ زيات شوی دی.
د پاکستاني رسنیو د رپوټ له مخې؛ هغه دغه څرګندونې د سعودي عربستان د تجارت له وزير ماجد الكسبي سره په رياض كې د نړۍوال اقتصادي کنفرانس په څنډه كې په یوه لیدنه کې کړي دي.
لومړي وزیر شریف ویلي، چې د پاكستان خصوصي پانګونې شورا بهرنۍ پانګونې ته د ودې وركولو او پانګهوالو ته د اسانتياو برابرولو له پاره په بشپړه توګه فعاله ده.
د سعودي د تجارت وزیر هم ویلي، چې د دغه هېواد د وليعهد محمد بن سلمان د هدایت له مخې پاکستان د پانګونې او تجارت په برخه کې د سعودي لومړیتوب دی.
نوموړي ویلي، چې تر راتلونكې یو تر يو نيم كال پورې د دوه اړخيزه اقتصادي او تجارتي اړيكو د زياتولو لپاره موخې ټاكل شوې دي.
د سعودي د تجارت وزير وويل، چې د سعودي د سوداګريزو ټولنو يو پلاوی به ډېر ژر د پاکستان ته سفر وکړي وکړي.
د امریکا د بهرنیو چارو وزیر انټوني بلېنکن د دوشنبې په ورځ له حماس څخه وغوښتل، چې د غزې په جګړه کې د اوربند او د دغې فلسطیني وسله والې ډلې له خوا د نیول شویو اسراییلي یرغمل شویو کسانو د خوشې کولو لپاره دې د اسراییل وړاندیز ژر تر ژره ومني.
تمه وه، چې د حماس مذاکره کوونکي د دوشنبې په ورځ په قاهره کې له قطري او مصري منځګړو سره وویني؛ تر څو د اوربند هغه وړاندیز ته ځواب ووايي، چې اسراییل د اونۍ په پای کې وړاندې کړی و.
بلېنکن د سعودي په پلازمینه ریاض کې د نړۍوال اقتصادي کنفرانس په یوه غونډه کې وویل: "حماس ته د اسراییل وړاندیز بیخي ډېر سخاوتمندانه دی."
هغه وویل: "یوازینی ډله چې د غزې د خلکو او اوربند ترمنځ ولاړه ده هغه حماس دی. دوی باید د اوربند په اړه پرېکړه وکړي او دا پرېکړه باید ژر تر ژره وکړي. زه هیله مند یم چې دوی به سمه پرېکړه وکړي."
یوه سرچینه چې د خبرو اترو په جریان کې ده وايي، چې د اسراییل د وړاندیز له مخې؛ د شاوخوا ۱۳۰ یرغمل شویو له ډلې د ۴۰ کسانو په بدل کې به په اسراییل کې یو شمېر بندي فلسطینیان خوشې شي.
د دایمي اوربند په اړه د حماس غوښتنې ته د اسراییل ځواب دا دی، چې په غزه کې به د "دوامداره ارامۍ دوره" رامنځته کیږي.
د اکټوبر په اوومه په سویلي اسراییل کې د حماس په برید کې ټول ۲۵۳ کسان یرغمل نیول شوي وو او شاوخوا ۱۲۰۰ اسراییلیان هم وژل شوي وو.
د غزې د روغتیايي چارواکو په وینا؛ اسراییل په غزه کې د بشپړې محاصرې په پلي کولو او د هوايي او ځمکني برید په په ترسره کولو سره شاوخوا ۳۴ زره ۵۰۰ فلسطینیان وژلي دي.
د خیبر پښتونخوا صوبې د ترهګرۍ ضد ادارې اعلان کړی، چې پر چینايي کارکوونکو د تېرې میاشتې د برید په تړاو یې څلور کسان نیولي، چې یو یې د تحریک طالبان پاکستان غړی دی.
تحریک طالبان پاکستان په دغه برید کې لاس لرل رد کړي وو.
دغې ادارې د دوشنبې په ورځ (د غويي ۱۰مه) د یوې اعلامیې په خپرولو سره وویل، چې د عدیل شهباز، محمد رفیق قریشي، زاهد قریشي او نذیر حسین په نومونو څلور تنه یې د خیبر پښتونخوا له مانسهرې ولسوالۍ څخه د چینايي کارکوونکو د برید په تور نیولي دي.
د ترهګرۍ ضد دغه اداره وايي؛ د تحریک طالبان پاکستان غړي عدیل شهباز په دغه برید کې د لاس لرلو اعتراف کړی دی.
تېره میاشت د خیبر پښتونخوا په بشام سیمه کې د یوه برید په ترڅ کې پنځه چینايي انجینران له خپل پاکستاني ډرېور سره ووژل شول.
دغه چینايي انجینران له اسلام اباد څخه د داسو د برېښنا سټیشن ته روان وو.
له دغه برید وروسته چین د دې پېښې د جدي څېړنې غوښتنه وکړه او د پاکستان سیاسي او پوځي مشرانو ژمنه وکړه، چې د دغه برید عاملین به د عدالت منګولو ته وسپاري.
تر دې برید څو ورځې وروسته یو شمېر چینايي پلټونکي د دې قضیې د تعقیب لپاره اسلام اباد ته ولاړل.
د چینایي کارکونکو ساتنه د پاکستان لپاره ډېر اهمیت لري؛ ځکه چې چینایي انجینران او شرکتونه د پاکستان په مهمو زیربناو کې کار کوي.
د یوې لارې او یو کمربند د پروژو لپاره د لویو لارو د جوړولو څخه نیولې تر لویو برېښنا کوټونو پورې چینايي متخصصین په پاکستان کې په کار بوخت دي.