د طالبانو د بدخشان د امنیه قومندانۍ ویاند وايي، د دغه ولایت په درایم ولسوالۍ کې، د دوی ځواکونو د کوکنارو کروندې له منځه وړلې چې خلک د ځینو کسانو په هڅونه د دوی په وړاندې ودریدل. خو ځايي خلک وايي، د طالبانو له خوا د خلکو «شخصي حریم» ته د نه درناوي له امله یې مظاهرې پیل کړې دي.
احسان الله کامګار د دې ادعا په ردولو سره وايي، چې د جمعې په ورځ د دوی ځواکونو د درایم په قرلک کلي کې کوکنار له منځه وړل چې د ځینې محدودو کسانو نور وهڅول او د طالبانو په مقابل کې یې ودرول.
نوموړی وايي، سیمه اییزو خلکو پر طالبانو د ډبرو او لرګو بریدونه کړي او هڅه یې کوله چې هغه وسایل هم وسوځوي چې د تاریاکو د وهلو له پاره سیمې ته وړل شوي وو.
نوموړي وايي، چې د لاریون کوونکو او طالبانو ترمنځ په رامنځ ته شوي اخ او ډب کې یو ملکي کس وژل شوی، خو دا لا معلومه نه ده چې دغه کس د لاریون کوونکو له خوا وژل شوی، که د طالبانو له لوري.
د غه طالب ویاند د خلکو شخصي حریم ته د دوی د ځواکونو ننوتل او د خلکو وهل او ډبول په اړه شوې ادعاوې ردوي.
نوموړي وايي، چې د پیښې د څیړلو لپاره سیمې ته یو پلاوی هم استاول شوی دی، خو سمیه ییزو سرچینو ویلي، چې د سیمو خلکو دغه پلاوی نه دی منلی.
په تیرو دوو ورځو کې د درایم او نن د ارګو ولسوالۍ اوسیدونکې د هغه څه پر وړاندې چې د طالبانو له خوا پر خپل حریم یې تیری بولی، د دغې ډلې په وړاندې لاریونونو پیل کړي، چې په دواړو ولسوالیو کې په تاوتریخوالي اوښتي دي.
