د حماس مرکچیان له اسراییل سره پر اوربند د خبرو لپاره قاهرې ته ورسېدل
د حماس یوه چارواکي رویټرز ته وویل چې د دې ډلې مرکچیان د شنبې په ورځ قاهرې ته رسیدلي چې په غزه کې پر داسې احتمالي اوربند خبرې وکړي چې ور سره ځینې یرغمل شوي هم خوشي کېږي.
د حماس یوه چارواکي رویټرز ته وویل چې د دې ډلې مرکچیان د شنبې په ورځ قاهرې ته رسیدلي چې په غزه کې پر داسې احتمالي اوربند خبرې وکړي چې ور سره ځینې یرغمل شوي هم خوشي کېږي.
د امریکا د مرکزي استخباراتو د ادارې سي ای اې مشر هم په قاهره کې دی.
قاهرې ته د حماس د پلاوي د تګ خبر د مصر له حکومت سره تړلې د القاهره نیوز ټلویزیوني شبکې هم تایید کړی دی.
یوې مصري امنیتي سرچینې رویټرز ته وویل: «د نن ورځې پایلې به متفاوتې وي. موږ پر ډېرو شیانو هوکړه کړې او یو څه پاتې دي.»
د منځګړیتوب له هڅو خبر یو فلسطیني چارواکی هم هیله منتیا ښودلې.
دغه چارواکي د نوم نه ښودلو په شرط رویټرز ته وویل: «دا ځل حالات سم ښکاري، خو دا دې پورې اړه لري چې ایا اسراییل به هغه څه وړاندې کړي چې اړین دي.»
د حماس پلاوی له قطر څخه قاهرې ته تللی. قطر او مصر په غزه کې د اوربند لپاره د منځګړتوب هڅه کوي.
تر دې مخکې ځینو سرچینو واشنګټن پوسټ ته ویلي و، چې امریکا قطر ته ویلي، که حماس اوربند ته غاړه نه ږدي او یرغمل شوي کسان خوشي نه کړي، په دوحه کې دې د دې ډلې دفتر وتړي.
