حنيف اتمر: یوناما باید د بدخشان د ولسونو د خوندیتوب لپاره بېړنۍ اقدام وکړي
د افغانستان د بهرنیو چارو پخواني وزير په افغانستان کې د ملګرو ملتونو له دفتر (یوناما) څخه غوښتي، چې د بدخشان ولس د خونديتوب لپاره دې بېړني اقدامات وکړي.
د افغانستان د بهرنیو چارو پخواني وزير په افغانستان کې د ملګرو ملتونو له دفتر (یوناما) څخه غوښتي، چې د بدخشان ولس د خونديتوب لپاره دې بېړني اقدامات وکړي.
حنيف اتمر د بدخشاني ولس سره د «طالبانو ناسم چلند غندلی او دا یې د هغوی سره ظلم» بللی دی.
د افغانستان د بهرنيو چارو پخواني وزير حنيف اتمر د یکشنبې په ورځ پر خپله اېکس پاڼه د بدخشان د ارګو او درایم ولسواليو له خلکو سره د طالبانو وروستي چلند ته په اشارې ليکلي، چې نړۍواله ټولنه دا هره پېښه په ډېر دقت او د يوې اندېښنې په توګه څاري.
نوموړي دا د طالبانو مسووليت بللی، چې باید د دې هر څه مخه ونيسي.
اتمر زياتوي: « د بدخشان له ولس سره هر ډول ناوړه چلند او تاوتریخوالی د افغانستان پر ټولو ولسونو ظلم او دا د غندنې او اعتراض وړ دی. اوسنی حاکمیت مکلف دی، چې د دغو ظلمونو مخه ونیسي او د ملت حقونو او ارادې ته درناوی وکړي.»
نوموړي د بدخشان د خلکو د خونديتوب په برخه کې د نړۍوالې ټولنې او یوناما څخه تمه کړې او ليکلي يې دي: « زموږ تمه دا ده، چې د نړۍوالې ټولنې د بشري حقونو او عدلي بنسټونه په ځانګړي ډول یوناما د خپل نړۍوال ماموریت سره سم په بدخشان کې زموږ د ولس د خوندیتوب لپاره بېړنيو اقداماتو ته لاس پکار شي.»
د تېري جمعې په ورځ د بدخشان د درایم ولسوالۍ کې اعتراض کوونکي وویل، طالبان د دې ولسوالۍ خلک کوڅه په کوڅه او کور په کور ځوروي.
د لاریونوالو له ډلې یوه یې مظاهرې ته په ونیا کې وویل، حتا د ښځو حرمت تر پښو لاندې شوی او طالبان د خلکو «عزت، دین او محرمیت» تر پښو لاندې کوي.
دغه لاريون کوونکي طالبان تورنوي، چې د خلکو د کورونو ديوالونه يې نړولي او پر خلکو ظلم کوي.
پرون شنبه بيا د طالبانو د بدخشان د امنیه قوماندانۍ ویاند احسان الله کامګار وویل، چې د دغه ولایت په درایم ولسوالۍ کې د دوی ځواکونو د کوکنارو کروندې له منځه وړلې، چې خلک د ځینو کسانو په هڅونه د دوی پر وړاندې ودریدل.
