د اوکراین په جګړه کې د ژورې ښکیلتیا په اړه د لوړ پوړو لویدیځ چارواکو له څرګندونو وروسته، روسیې د دوشنبې په ورځ وویل، چې د جګړې په ډګر کې د اټومي وسلو د کارولو په څېر تمرینونه ترسره کوي.
دغه اعلان د روسیې د ولسمشر ولادیمیر پوتین د پنځمې دورې له د لوړې له مراسمو وروسته او د روسیې له خوا د “بریا ورځ” د نمانځلو په اونۍ کې شوی دی.
په دغه ورځ د دویمې نړۍوالې جګړې پر مهال روسي ځواکونو نازي جرمنې ته ماتې ورکړې وه. روسیه دغه ورځ تر ټولو مهمه رخصتي بولي چې د دین سره تړاو نه لري.
د روسیې دفاع وزارت په یوه اعلامیه کې ویلي، چې دا تمرینونه د روسیې په اړه د ځینو غربي چارواکو د پاروونکو څرګندونو او ګواښونو ځواب دی.
دا لومړی ځل و، چې روسیې په عامه توګه د تکتیکي اټومي وسلو تمرینونه اعلان کړل؛ خو د دغه هېواد ستراتیژیک اټومي ځواکونه په منظم ډول تمرینونه کوي.
په تکتیکي اټومي وسلو کې د جګړې په ډګر کې کارېدونکي هوايي بمونه، د لنډ واټن ویشتونکي توغندي او د توپخانې مهمات شامل دي.
دغه ډول وسلې د ستراتیژیکو هغو په پرتله یو څه لږې ځواکمنې دي.
د روسیې دغه اعلان د اوکراین لویدیځو متحدینو ته خبرداری و، چې اوس غواړي په روانې دوه کلنه جګړه کې په ژوره توګه ښکیل شي.
تر دې مهاله د کرملین ځواکونو د اوکراین د سرتېرو او وسلو د کمښت له امله، په دغه جګړه کې برلاسی دي.
د اوکراين ځينو لوېديځو متحدينو تر دې مخکې اندېښنه ښودلې وه، چې ښايي دغه جګړه د ناټو او روسيې تر منځ پر جګړې بدله شي.
د فرانسې ولسمشر ایمانویل مکرون تېره اونۍ وویل، چې هغه اوکراین ته د سرتېرو د لېږلو احتمال نه ردوي.
په همدې حال کې انګلستان د بهرنیو چارو وزیر ډیویډ کامرون ویلي، چې د کییف ځواکونه کولای شي دننه په روسیه کې د اهدافو د ویشتلو له پاره د برېتانیا د اوږد واټنه ویشتونکې وسلې وکاروي.
د ناټو ځینې نورو هېوادونه چې کییف ته وسلې ورکوي، دا احتمال رد کړی دی.
کرملین دا څرګندونې خطرناکې بللې، چې د روسیې او ناټو ترمنځ ترینګلتیا زیاتوي.
د غزې په دغو سیمو کې د اسراییل د بریونو له امله بې ځایه شوي له یو میلیون څخه زیات خلک ژوند کوي.
په داسې حال کې چې په قاهره کې د اوربند خبرې اترې ځڼډېدلې دي، په رفح ښار د اسراییل د پراخ برید په اړه اندېښنې زیاتې شوې دي.
اسراییل له ډېر وخت راهیسې په رفح ښار د برید ګواښ کوي او وايي، چې هلته د حماس ډلې د پټنځایونو په وړاندې عملیات کوي.
په رفح ښار د برید په اړه د اسراییل له خوا سمدستي کومه تبصره نه ده شوې؛ خو د حماس پورې تړلې الاقصی ټلویزیون ویلي، چې د رفح ښار ختیځ سیمې یې بمبار کړي، چې وړاندې یې د تخلیې امر شوی و.
د اسراییل پوځ په عربي متن لیکل شویو پیغامونو او له الوتکو څخه د غورځول شویو لارښونو له لارې له خلکو غوښتي، چې له رفح ښار څخه ۲۰ کیلومتره وړاندې هغه سیمې ته پناه یوسې چې دوی یې بشري ساحه بولي.
ځینو فلسطیني کورنیو د تېز باران لاندې دغو سیمو ته تلل پیل کړي دي.
تر دې وړاندې د امریکا په ګډون ګڼو هیوادونو او مرستندویه ډلو اسراییل ته خبرداری ورکړی و چې په رفح ښار برید به د پراخې ملکي مرګ ژوبلې او غزه کې د روان بشري ناورین د لا ژور کېدو لامل شي.
