د سرپل ولايت له بلخاب ولسوالۍ څخه باوري سرچېنو د افغانستان انټرنشنل راډيو ته ويلي، چې طالبانو د دې ولسوالۍ ۱۴ اوسېدونکي نيولي او شکنجه کړي دي. د سرچېنو د معلوماتو له مخې، له څو اوونيو په تېرېدو سره د بنديانو کورنیو له زندانیانو سره نه دي ليدلي.
ځايي خلکو افغانستان انټرنشنل ته ویلي، چې د غويي مياشتې په ٢٥مه د طالبانو د استخباراتو يو شمېر غړي د جاسوسۍ په موخه بلخاب ته تللي او هڅه يې کړې، چې د طالبانو د "ظلم" په اړه له ځايي خلکو سره خبرې وکړي.
د سرچېنې د معلوماتو له مخې، کله چې يو شمېر ځايي خلکو د طالبانو له توپیري چلند څخه شکايت وکړ او د طالبانو ضد مقاومت له جبهې سره يې خواخوږي څرګنده کړه، د هغوى غږونه د "طالبانو جاسوسانو" ثبت کړل.
له دې پېښې وروسته طالب ځواکونو د بلخاب ولسوالۍ پر درېیو کلیو برید وکړ او ۱۴ ملکي وګړي یې ژوندي ونیول.
د سیمه ییزو سرچېنو په وینا، طالبانو د دغو کسانو له کورنیو غوښتي، چې د دغې ډلې د پخواني قوماندان مولوي مهدي مجاهد له خوا پاتې شوې وسلې ورته وسپاري.
د ۱۴۰۱ کال د زمري میاشتې په ۲۶مه له یو لړ جنجالونو وروسته طالبانو اعلان وکړ ، چې په سرپل کې د دوی سیمه ییز قوماندان مولوي مهدي مجاهد وژل شوی دی.
خو د بلخاب ولسوالۍ اوسېدونکي وايي، چې وسلو ته لاس رسی نه لري او د وسلو د پېرلو مالي توان نه لري. ځينې سرچينې وايي، چې په بلخاب کې طالبان ځايي خلک اړ کوي، چې د وسلو په بدل کې پيسې ورکړي.
د طالبانو د پخواني قوماندان مولوي مهدي مجاهد له وژل کېدو وروسته په بلخاب کې له بشري حقونو د پراخو سرغړونو راپورونه ورکړل شوي دي.
د افغانستان د بشري حقونو کمیسیون د چنګاښ په ۱۴مه په یوه بیان کې طالب ځواکونه د سرپل ولایت په بلخاب کې پر ملکي وګړو په "ډزو" تورن کړل.
