د پاکستان ښځينه کرېکټ لوبډله د انګلستان ښځينه کرېکټ لوبډلې سره د شل اوره او يو ورځينو سیالیو لپاره پرون لندن ته رسېدلې ده. دواړه لوبډلې به درې شل اوره او درې يو ورځنۍ لوبې سره وکړي.
د پاکستان دولتي رادیو د راپور له مخې د ندا ډار په مشرۍ ۱۷ کسيزه لوبډله به له سیالې لوبډلې سره د دې سياليو لومړۍ شل اوره لوبه د همدې می مياشتې په ۲۴مه په برمنګهم ښار کې وکړي.
په بهر کې د پاکستان ښځينه کرېکټ لوبډلې دا سیالۍ له هغه وروسته دي چې څو ورځي وړاندې یې په خپل کور کې د پنځو شل اوره او د ۳ يو ورځنيو لوبو په دواړه لوبلړیو کې له ويسټ انډيز ماتې وخوړه.
د چمن پرلتوالو له هغه وروسته د پاسپورټ اداره، د پاکستان دولتي بانک، چمن پرېس کلپ، د پولیو ضد واکسین ادارو دروازې او چمن ـ کوټې لار بنده کړه چې درې ورځې وړاندې په چمن کې ځايي امنیتي ځواکونو پر هغوی برید وکړ.
د چمن د پرلت ویاند صادق خان اڅکزي د سه شنبې په ورځ (د غويي ۱۸مه) افغانستان انټرنشنل ـ پښتو ته وویل، چې د خپلو اعتراضونو په دوام یې تازه نن سهار د پاکستان دولتي بانک، د پولیو ضد واکسین اداره او د چمن پرېس کلپ دروازې بندې کړې دي.
صادق خان اڅکزی وايي:« د پاکستان حکومت زموږ غوښتنې نه مني، پر دې سربېره یې زموږ پر ملګرو برید وکړ، پرلتوال یې شهیدان او زخمیان کړل. تر څو چې زموږ غوښتنې نه وي منل شوې په چمن کې به نشنل (ملي) بانک، د پولیو ضد واکسین اداره، د چمن پرېس کلپ، د پاسپورټ اداره او کوټې ـ چمن لاره به تړلې وي.»
یادو پرلتوالو تېره ورځ د پاسپورټ ادارې دروازه وتړله او د پاسپورټ ادارې مخې ته یې هم پرلت وواهه.
پرلتوالو درې ورځې وړاندې د کوټې ـ چمن عمومي لاره هم پر پرلت د پاکستاني ځواکونو د برید په غبرګون کې وتړله.
بل خوا د پښتونخوا عوامي ګوند مشر محمود خان اڅکزی وایي، د چمن پر ځايي امنیتي ځواکونو مسوولینو دې پر لاریون کوونکو د ډزو په جرم قضیې ثبتې شي.
محمود خان اڅکزي له پاکستاني رسنیو سره په خبرو کې ویلي چې، پاکستان د سپین بولدک ـ چمن دروازې په تړلو سره د دواړو غاړو قومونه نه شي بېلولای.
کابو اووه میاشتې وړاندې د چمن ځايي خلکو، سوداګرو او مدني فعالانو د پاکستان له لوري د سپین بولدک ـ چمن پر دروازه د پاسپورټ د جبري کېدو په غبرګون پرلت وواهه.
خو درې ورځې وړاندې پاکستاني ځواکونو پر پرلت کوونکو برید وکړ، تر دې مهاله د دوه پرلت وهونکو مړینه او د نږدې شل نورو ټپي کېدل تایید شوي دي.
د پاکستان حکومت د نجونو د تعلیم د ودې لپاره یو لړ نوښتونه پیل کړي او په وروستي اقدام کې به ۲۰ بسونه په پلازمینه اسلام اباد کې ښځینه زده کوونکو او ښوونکو ته وړیا ترانسپورټي خدمتونه برابروي.
د پاکستان د معارف وزارت د سیمه ییزو ادارو سره په ګډه دغه ۲۰ بسونه برابر کړي، چې په پلازمینې اسلام اباد کې دغه ټرانسپورټي خدمتونه وړاندې کوي.
د ګلابي رنګ لرونکي دغه بسونه به په ځانګړې توګه ښځینه زده کونکو او ښوونکو ته وړیا ټرانسپورټي خدمات وړاندې کړي، چې د ښار په کلیوالو او ښاري سیمو کې ژوند کوي.
د پاکستان حکومت دا پرېکړه ځکه کړې ده، چې شته ټرانسپورټي اسانتیاوې په ځانګړې توګه د زده ښځو له پاره کافي نه دي.
په اسلام اباد کې د ټولو ۳۸۵ بسونو له ډلې شاوخوا ۳۰ سلنه د بېلابېلو دلایلو له امله له کاره وتلي دي.
د پاکستان د ټرانسپورټ وزارت په پام کې لري چې دغه بسونه د راتلونکې جون میاشتې تر نیمايي پورې بېرته ورغوي او د ښاري ټرانسپورټ برخه یې کړي.
پاکستاني رسنۍ جيو نيوز په خپل خبر کې ويلي، چې جعفر مندوخېل د والي په دفتر کې د بلوچستان د نوي والي په توګه لوړه وکړه. نوموړی د پاکستان د مسلم لیګ نواز ګوند غړی د سويل لوېديځي صوبې بلوچستان ۲۴م والي شو.
پاکستاني رسنۍ جيو نيوز د دوشنبې په ورځ په يوه خبر کې ويلي، چې د بلوچستان د نوي والي جعفر مندوخېل د لوړې په مراسمو کې د سترې محکمې قاضيانو، سياسيون او دولتي چارواکو برخه اخيستې وه.
د لوړې له مراسمو وروسته د بلوچستان نوي والي مندوخېل په خپل دفتر کې ژمنه وکړه، چې د فدراسيون او ولایت ترمنځ به د پله رول لوبوي.
هغه زياته کړه: « د سيمې د ستونزو او مشکلاتو اړوند به له فدرالي حکومت سره خبرې کوي، په سيمه کې د حکومتدارۍ په برخه کې د ښه کارونو لپاره ځای شته.»
مندوخېل د ګوادر بندر د اغزن تار په اړه وويل، چې د داسې کوم پرمختګ په اړه معلومات نه لري.
نوموړي زياته کړه: « په ګوادر کې د اغزن تار په اړه هېڅ معلومات نه شته، که دا د امنيتي موخو لپاره نصب شي نو ښه خبره ده.»
جعفر خان مندوخېل په ۱۹۵۶ کال په کوېټه کې زېږېدلی او د بلوچستان پوهنتون کې يې تر ماسټری زده کړې کړي دي.
نوموړی په ۱۹۷۴ کې سياست ته داخل شوی او پر بېلابيلو ګوندي او حکومتي څوکيو یې دندې ترسره کړي دي.
د سوېلي پښتونخوا چمن پرلت د مشرانو کمېټې غړی قاري امداد الله وايي، د خپلو اعتراضونو په لړ کې یې تازه په چمن ښار کې د پاسپورټ دفتر دروازه تړلې او د دغه دفتر مخې ته یې دا ځل پرلت وهلی. پرلت کوونکو ګواښ کړی چې په نږدې ورځو کې به نورې حکومتي ادارې هم وتړي.
قاري امداد الله افغانستان انټرنشنل پښتو ته وویل: «پاکستاني ځواکونو په ډیرې سپین سترګۍ پر پرلت برید وکړ، زموږ ملګري یې شهیدان او ټپیان کړل او اوس هم ځینې کسان چې ټپیان دي، پاکستاني ځواکونو له ځان سره وړي. موږ نن د پاسپورټ دفتر دروازه وتړله او تردې به هم سخت ګامونه واخلو.»
همدارنګه پرلتوال وايي، سبا سه شنبه په چمن ښار کې د پاکستان د دولتي بانک څانګې هم تړي، پولیسو او دولتي کارکوونکو ته یې خبر ورکړی چې د پاکستان دولتي بانک ته دې له ورتګه ډډه وکړي.
د چمن پرلتوالو د خپلو اعتراضونو په دوام تردې وړاندې د چمن ـ کوټې لویه لاره هم تړلې وه او له تېرو دوو ورځو راهیسې پر دغه لاره هر ډول تګ راتګ بند دی.
پرلتوال وايي، د ښار خلکو د ستونزو کمولو لپاره یې نن سهار په چمن ښار کې کار بندیز پای ته رسولی.
دغه پرلت وال وايي، د خپل کار روزګار په موخه یې له تېرو اوو میاشتو راهیسې د سپین بولدک ـ چمن پر دروازه د پاسپورټ د جبري کېدو په غبرګون په سوله ییز ډول پرلت وهلی و، خو د دې پر ځای چې د پاکستان حکومت یې غږ واوري پر پرلتوالو یې برید وکړ.
د چمن پر پرلتوالو د پاکستاني ځواکونو د برید له امله د اوښتي مرګ ژوبلې په اړه ضد او نقیض راپورنه ورکړل شوي دي.
خو پرلت وایي د پاکستاني ځواکونو په ډزو د وژل شوي یوه کس جسد یې تېره ورځ خاورو ته سپارلی او نږدې شل کسان نور ټپیان دي.
تردې مهاله د پاکستان حکومت د چمن پر پرلتوالو د برېد او هغوی ته د اوښتي مرګ ژوبلې په اړه څه نه دي ویلي.
د پاکستان د جمعیت علمای اسلام ګوند مشر مولانا فضل الرحمن په تازه بیان کې د پاکستان پوځ ته په اشارې ویلي، چې په افغانستان کې د امریکا خلاف جګړې ته ۳۰ زره پاکستاني وسلوال څنګه او په کومه لاره تللي وو. مولانا وايي، هغه ۳۰ زره ځوانان افغانستان ته د طالبانو د ملاتړ لپاره تللي وو.
د پاکستان د جمعیت علمای اسلام ګوند مشر مولانا فضل الرحمن یوې لویې ولسي غونډې ته چې ښکاري په لسګونو زرو خلکو په کې ګډون کړی، ویلي چې تر ۳۰ زرو پورې وسلوال پاکستانیان په کومه لاره او څنګه کولای شي افغانستان ته د طالبانو د ملاتړ په موخه د جګړې لپاره ولاړ شي؟.
ویل کیږي دغه غونډه د پاکستان جمعیت علمای اسلام ګوند له لوري په کراچۍ کې ترسره شوې.
مولانا فضل الرحمان د هغو پاکستاني وسلوالو خبره کوي چې د تېر جمهوري حکومت پر مهال د طالبانو د ملاتړ لپاره په افغانستان کې د افغان حکومت او نړېوالو ځواکونو په وړاندې جنګېدل.
هغه وايي، «جنرال باجوه راته ویل، چې پر ډیورنډ کرښه یې په میلیارډونو روپیو اغزن تار لګولی او هېڅوک پرې تګ راتګ نه شي کولای.»
مولانا فضل الرحمن د پاکستان د پوځ مشران د پوښتنې په ډول ننګولي دي او وايي، « هغه له ۲۰ تر ۳۰ زرو پاکستاني وسله وال ځوانان، چې افغانستان کې یې د امریکایانو په خلاف جګړه کې د اسلامي امارت په ملاتړ برخه لرله، هغوی څنګه او کله تلل؟ او بیا چې طالبان هلته افغانستان کې واکمن شول، دغه ځوانان څنګه په کومه لاره او له بشپړ ځواک سره بېرته پاکستان ته راستانه شول؟»
هغه په ټینګار سره د پاکستان له پوځ پوښتلي چې، «تاسو خو د پولې په اوږدو کې ولاړ وئ، نو څنګه په دومره لوی شمېر وسلوال تګ راتګ کوي؟»
د نوموړي په وینا، که څه هم پاکستان ځواکمن پوځ او ډېر وسایل لري خو باور پرې نه شي کېدلی.
د مولانا فضل الرحمان دغو څرګندونو ته د پاکستان د پوځ او حکومت مشرانو او طالبانو لا غبرګون نه دی ښودلی. خو تر دې وړاندې بیا د پاکستان حکومت مشرانو په کابل کې په طالبانو تور پورې کړی چې د ټي ټي پي وسله وال له افغانستان څخه راځي او په پاکستان کې بریدونه کوي.
طالبانو د پاکستان داسې څرګندونې رد کړې او له ټي ټي پي سره د دوی مخالفت یې د دغه هیواد کورنۍ موضوع بللې.