د پاکستان فضايي څېړنیز ماموریت خبر ورکړی، چې د چین په همکارۍ د پاکستان لومړنی فضايي ماموریت «ای کیوب قمر» په بریالیتوب سره ترسره شوی او سپوږمکۍ د سپوږمۍ مدار ته داخله شوې ده.
پاکستاني رسنیو د چهارشنبې په ورځ راپور ورکړی، چې دا سپوږمکۍ به خپل ماموریت به له درېیو څخه تر شپږو میاشتو پورې د سپوږمۍ په مدار کې تېر کړي.
د پاکستان د فضايي څېړنو ماموریت (سپارکو) ویاند ویلي، چې د پاکستان سپوږمکۍ «ای کیوب قمر» د سپوږمۍ مدار ته ننوتې، چې لومړیی انځور به د می میاشتې په ۱۶مه نېټه ځمکې ته راولېږي.
د ای کیوب قمر په نوم دا سپوږمکۍ د چین د شانګهای پوهنتون او د پاکستان ملي فضايي ایجنسۍ له خوا جوړه شوې ده.
د سپارکو ویاند وویل چې «ای کیوب قمر» د پاکستان پر وخت د ماسپښین په ۱:۱۴ بجو د سپوږمۍ مدار ته داخل شو، سپوږمۍ ته له استولو وروسته دا سټلایټ د ډیزاین شوې تخنیک له مخې کار کوي.
ویاند وویل، چې د ای کیوب قمر د کنټرولرانو، سب سیسټمونو او پروتوکولونو په مدار کې ازموینه روانه ده، دا ماموریت به د سپوږمۍ مدار ته له رسېدو وروسته له ۵ څخه تر ۶ ورځو پورې په ازماېښتي مرحله کې وي.
د ویاند په وینا؛ د سپوږمۍ لومړی عکس به د می په ۱۶مه د ازموینو او وسایلو له فعالېدو وروسته ترلاسه شي.
پاکستان د سپوږمکۍ او پلټونکي د توغولو لپاره تاسیسات نه لري او د چین په همکارۍ فضايي ماموریت تر سره کوي.
پاکستان د چین د فضايي مرکز په همکارۍ د می میاشتې په درېیمه نېټه په تاریخ کې د اول ځل لپاره د سپوږمۍ مدار ته د یوې سپوږمکۍ په لېږلو سره لومړنی فضايي ماموریت پیل کړ.
د ای کیوب قمر په نوم دا سپوږمکۍ د چین په هینان ولایت کې له یوه فضايي مرکز سهار وختي د پاکستان په وخت نږدې دوه نیمې بجې وتوغول شوه.
تازه د پاکستان د پوځ ویاند په راولپنډۍ کې د خبري غونډې پر مهال وویل، چې په سیمه کې پاکستان د ترهګرۍ پر وړاندې مهم کردار ادا کوي.
هغه وویل، چې ټي ټي پي د افغان خاورې په کارولو سره د دوی پر ضد فعاليت کوي او پاکستان په هره کچه له طالبانو سره مرسته کړې؛ خو د افغانستان موقت حکومت (طالبان) لا هم پر ژمنو عمل نه دی کړی او شواهد ښيي، چې ټي ټي پي د افغانستان خاوره د دوی پر ضد کاروي.
بل خوا د طالبانو د دفاع وزارت ویاند عنایت الله خوارزمي پر خپلې اېکس پاڼې لیکلي، چې د پاکستان د پوځ د ویاند وروستۍ ادعاوې بې مسوولیته او له حقیقت څخه لرې دي.
د پاکستان د پوځ ویاند د داسو د پېښې اصلي عاملین افغانان ګڼلي وو؛ خو خوارزمي وايي، چې د خیبر پښتونخوا په یوه داسې سیمه کې چې د پاکستان د پوځ تر کلک امنیتي پوښښ لاندې ده د چینايي اتباعو وژل کېدل د پاکستاني امنیتي ارګانونو کمزوري او یا هم له حمله کونکو سره همکاري په ډاګه کوي، چې په دواړو صورتونو کې یې مسوولیت د پاکستان حکومت ته متوجې دی.
نوموړی وايي، چې دوی له خپلې خوا د چین هېواد ته په دې مورد ډاډ ورکړی او هغوی هم په حقیقت پوه شوي دي، چې دوی په داسې موضوعاتو کې ښکیل نه دي.
خوارزمي زیاته کړې: "موږ د داعش خوارجو ګڼ موارد لرو، چي د پاکستان له خاورې څخه افغانستان ته را اوښتي، د هغوی خاوره زموږ پر ضد کارول شوې او پېښې له هغه هېواد څخه تنظیمیږي، چې پاکستان یې باید په اړه ځواب ووايي."
نوموړي زیاته کړې، چې طالبان د پاکستان ثبات او امنیت د افغانستان او سیمي په ګټه بولو او د افغانستان او پاکستان د ولسونو په ورورۍ او ښو اړیکو باور لري.
د پاکستان او طالبانو تر منځ د ترهګرو پر موجودیت ناندرۍ وروسته له هغه پيل شوې، چې په کابل کې طالبان یو ځل بیا واک ته ورسېدل او په ورته وخت کې پاکستاني طالبانو په پاکستان کې خپل بریدونه زیات کړل.
