په نیویارک کې میشت د خبریالانو د خوندیتوب نړیوالې کمیټې او د افغانستان د خبریالانو مرکز د طالبانو له خوا پر افغانستان انټرنشنل د بندیز لګول غندلي دي.
د طالبانو ډلې د افغانستان انټرنشنل پر فعالیتونو بندیز لګولی او دغه شبکه یې پر بې طرفۍ تورنه کړې ده.
د خبریالانو د خوندیتوب د کمیټې د اسیا د پروګرام همغږي کوونکي، بېلهیه په یوه خبرپاڼه کې وویل، «طالبان باید سمدستي پر افغانستان انټرنشنل لګیدلي بندیزونه لیرې کړي او افغان خبریالانو او اتباعو ته اجازه ورکړي چې په ازاده او له وېرې پرته د دې شبکې خبرونو او تحلیلونو ته لاسرسی ولري.»
د افغانستان د خبریالانو مرکز او د بیان د ازادۍ کور د طالبانو دا کړنه د قانون خلاف بللې او له طالبانو یې غوښتي چې د ازادو رسنیو حقونو ته درناوی وکړي.
طالبانو د افغانستان انټرنشنل رسنۍ د دې ډلې د رسنیو له اصولو څخه په سرغړونې تورنه کړې ده. د طالبانو د رسنیو د سرغړونو د څېړلو کمېسیون وايي، چې په لندن کې مېشتې دغې رسنۍ بې پرېتوب تر پښو لاندې کړی او د ټولنې اخلاقي او رواني امنیت یې زیانمن کړی دی.
د دغې ډلې په اعلامیې کې پر افغانستان انټرنشنل، د خکلو شخصي حریم ته د نه درناوي، د شخصیت وژنې، په عامه توګه د اطلاعاتو تحریف او د طالبانو مخالفو ډلو ته د پروپاګند کولو باندې تورنش شوی دی. د طالبانو د رسنیو د سرغړونې کمیسیون د دغو تورونو په اړه شواهد نه دي وړاندې کړي.
"بې اساسه"
افغانستان انټرنشنل د طالبانو دغه تورونه بې اساسه بللي دي. د دې شبکې اداره وايي، افغانستان انټرنشنل به د افغانستان خلکو ته د ازادو او بې پرې خبرونو او معلوماتو د رسولو په برخه کې خپلو هڅو ته دوام ورکړي.
د افغانستان انټرنیشنل اجراییوي مشر هارون نجفی زاده دغه ادعاوې رد کړې او ویې ویل:«هیڅ فشار به د دې لامل نشي چې موږ د ژورنالیزم لوړ معیارونه او مسلکي اصول له پامه وغورځوو. د طالبانو فشار ازادو رسنیو ته ګواښ دی، خو زموږ د فعالیتونو مخه نه شي نیولی. افغانستان انټرنشنل د ټولو افغانانو د غږ لپاره یو کور دی.
د یو شمېر نړیوالو بنسټونو د شمېرو او سروې ګانو له مخې چې د افغانستان انټرنېشنل اوس د طالبانو تر واک لاندې افغانستان کې تر ټولو مشهوره خبري رسنۍ ده.
یوه سروې چې د میډیا ایکشن له خوا د بي بي سي د نړیوالې څانګې په سپارښتنه ترسره شوې، ښیي چې افغانستان انټرنشنل په افغانستان کې تر ټولو زیات لیدل کیدونکی نړیوال ټلویزیون دی.
طالبانو په خپله وروستۍ اعلامیه کې د افغانستان له خلکو غوښتي چې د افغانستان انټرنشنل راډیو او ټلویزیون بایکاټ کړي.