ملګرو ملتونو نن خبرداری ورکړ ی چې غزې تړانګې ته د مرستو لیږد به په څو ورځو کې ودریږي، ځکه چې اسراییلي سرتیرو له فلسطیني جنګیالیو سره خپله ځمکنۍ جګړه رفح ښار ته رسولې. رفح ته چې د جګړې له امله ګڼو خلکو پناه وړې د د قحطۍ له ګواښ سره د مخ غزې لپاره د مرستو رسولو مهمه لار بلل کیږي.
اسراییلي ټانکونو هغه عمومي سړک نیولی چې د رفح ښار ختیځې او لوېدیځې برخې سره وېشي او د ښار ختیځه برخه یې محاصره کړې ده.
د دغه برید له امله امریکا له خپل متحد اسراییل سره ځیني پوځي مرستې بندې کړې دي.
د رفح ښار اوسیدونکي وايي، چې نن یې د غزې تړانګې په سویلي څنډه او د دغه ښار په ختیځ او شمال ختیځو سیمو کې دوامداره چاودنې او د توپونو ډزې اوریدلې دي.
د هغوی په وینا، په سیمه کې د اسراییلي پوځ او حماس جنګیالیو ترمنځ سخته جګړه روانه ده.
حماس ویلي، چې د ښار په ختیځ کې یې یوه جومات ته څېرمه اسرايیلي ټانکونه په نښه کړي، هغه څه چې رفح ښار ته د اسراییلي ځواکونو ننوتل ښيي.
اسراییل د رفح له ختیځې برخې څخه ملکي وګړو ته د وتلو امر کړی او په لسګونو زره خلک یې اړ کړي چې له ښاره بهر سیمو کې پناه واخلي.
تر دې وړاندې څه باندې یو میلیون فلسطینیانو د اسراییل د بریدونو له ویرې رفح ښار ته پناه وړې وه.
اسراییل وايي، پر رفح ښار له برید پرته له حماس سره جګړه نه شي ګټلی او ادعا کوي چې د دغې ډلې زرګونه جنګلیاو په رفح ښار کې پناه اخیستي.
د ملګرو ملتونو مرستندویه ادارو ویلي، چې لا له وړاندې غزې ته د مرستو اکمالات محدود و او پر رفح ښار د اسراییل له برید وروسته کیدای شي چې د مرستو رسول په بشپړه توګه ودریږي، ځکه چې غزه کې د تیلو او خوراکي توکو زیرمې مخ په خلاصیدو دي.
په غزه تړانګه کې د یونیسف لوړ پوړي همغږي کوونکي، هامیش ینګ وویل، "له پنځو ورځو راهیسې، غزې ته هیڅ تیل او نورې بشري مرستې نه دي رسیدلې او موږ په زیرمو کې پاتې وروستۍ مرستې کاروو."
مرستندویه ادارې وايي، چې جګړې تر اوسه په سلګونو زره بې ځایه شوي ملکي وګړي له سختو زیانونو سره مخامخ کړي دي.
