د طالبانو د مخابراتو او معلوماتي تکنالوجۍ وزير په کابل کې د چين له سفير وغوښتل، چې د بدخشان د واخان له لارې دواړه هېوادونه په نوري فايبر سره وصل شي. نجيب الله حقاني ويلي، د دې پلان عملي کېدو سره به چین د اوږدو لارو پر ځای په لنډه لار له ځینې اسيايي هېوادونو سره هم وصل شي.
د طالبانو مخابراتو او معلوماتي تکنالوجۍ وزارت نن پر خپله اېکس پاڼه په اعلاميه کې ويلي، چې طالب وزير نجيب الله حيات حقاني د اسیايي هېوادونو سره د نوري فايبر له لاري د چين د نښلولو لپاره همدا لاره تر ټولو اسانه بللې.
حقاني زياتوي: « افغان لوری به ډېر ژر د افغانستان دننه خپل کیبل تر سرحدي سیمو ورسوي تر څو له دې لارې چین سره د نوري فایبر کیبل له طریقه وصل شو او چین هم کولای شي د اوږدو لارو پر ځای پر لنډو لارو له اسیايي هېوادونو سره د نوري فایبر له طریقه ځان ونښلوي.»
د طالبانو د اعلامیې له مخې، په کابل کې د چين سفير ژاوشينګ په دې برخه کې لېواتيا وښوده او زياته يې کړه: « دوی لیواله دي، چې د واخان له لارې د نوري فایبر کیبل وغځوي او په دې برخه کې به خپلو مسلکي او د دې برخې ماهرینو سره خبرې وکړي.»
د واخان له لارې طالبان له چین سره د وصلېدو غوښتنه په داسې حال کوي چې لا هم له دې لارې د افغانستان او چین سوداګرۍ نه ده پیل شوې.
که څه هم طالبان په واخان کې د چین تر سرحد د سړک جوړولو ادعا کوي، خو چین په خپله خاوره کې تر دې سیمې سړک نه دی غځولی او نه یې کومه لېوالتیا ښودلې ده.
خو له دې سره واک ته د طالبانو په رسېدو چين له دغې ډلې سره په بېلابېلو برخو کې خپلې اړيکې ټينګي کړې او خپل تګ راتګ یې زيات کړی دی.
د چين سوداګريزو شرکتونو د افغانستان د کانونو بېلا - بېل قراردادونه تر لاسه کړي دي.
چین لومړنی هېواد دی چې د طالبانو واکمنۍ کې یې تېر دوبی خپل رسمي سفیر کابل ته واستاوه او هم یې د بېجینګ لپاره د طالبانو سفیر ومانه.
