د ملګرو ملتو د ماشومانو د ملاتړ اداره وایي، جاپان په افغانستان کې د ماشومانو او ښځو لپاره د اړینو واکسینونو په برخه کې ۶.۹ مېلیونه ډالر مرسته کوي. د دغې ادارې په خپره شوې خبرپاڼه کې راغلي، چې د دغه پروګرام له لارې به په منظمه توګه ۴.۱ مېلیون ماشومان او ښځې واکسین شي.
خبرپاڼه کې راغلي، د جاپان حکومت د یونیسېف د هڅو په ملاتړ د جاپان د (جایکا) ادارې په همکارۍ په افغانستان کې د ماشومانو او ښځو د حقونو او هغوی ته د بېړنیو اړتیاوو برابرولو په برخه کې اضافي ۶.۹ ملیون ډالره مرسته کړې.
دغه مرسته به د شري، نري رنځ، ګوزڼ، تور زېړي او تیتانوس څخه د ۴.۱ مېلیون ماشومانو او مېرمنو واکسیني خدمتونه د پولیو واکسین د ملي کمپاین له لارې له پولیو یا ګوزڼ ناروغۍ څخه د ۴.۷ مېلیون ماشومانو د ساتنې لپاره ولګول شي.
په کابل کې د جاپان سفیر کرومیا تاکایوشي وایي:« موږ ژمن یو، چې د افغانستان د ښځو او ماشومانو لپاره د واکسیناسیون پروګرام ملاتړ کوو او د واکسین کمپاین به لا پراخ کړو.»
له بل پلوه په افغانستان کې د یونیسېف استازي تاج الدین اویویل ویلي:« د پولیو په څېر ناروغۍ د ماشومانو ژوند تباه کوي؛ خو د مخنیوي وړ ده. واکسین د دغو وژونکو او ساري ناروغیو څخه د ماشومانو د ساتنې لپاره یو ډاډمن او ارزانه لاره ده. موږ د افغانستان د روغتیايي سیسټم د پیاوړتیا او د مخنیوي وړ ناروغیو څخه د زیاتو ښځو او ماشومانو د ساتنې لپاره د جاپان د حکومت د دوامدارې مرستې هرکلی کوو.»
له بل پلوه په افغاستان کې د جاپان سفیر تاکایوشي کورومیا وایي، چې هېواد یې د ښو روغتیایي خدمتونو د وړاندې کولو، د دغې برخې د کارکوونکو د ظرفیت لوړونې او د واکسین د تطبیق په برخه کې د خوړو نړۍوال پروګرام او یونیسېف له لارې افغانستان ته ۱۳.۸ مېلیون ډالره ځانګړي کړي دي.
نوموړي دغه څرګندونې تېره ورځ د طالبانو د اقتصاد وزیر دین محمد حنیف سره د لیدلو پرمهال کړې دي.
