په افغاستان کې د جاپان سفیر تاکایوشي کورومیا وایي، چې هېواد یې د ښو روغتیایي خدمتونو د وړاندې کولو، د دغې برخې د کارکوونکو د ظرفیت لوړونې او د واکسین د تطبیق په برخه کې د خوړو نړۍوال پروګرام او یونیسېف له لارې افغانستان ته ۱۳.۸ مېلیون ډالره ځانګړي کړي دي.
نوموړي دغه څرګندونې تېره ورځ د طالبانو د اقتصاد وزیر دین محمد حنیف سره د لیدلو پرمهال کړې دي.
نوموړي په دغه لیدنه کې په افغانستان کې د وروستیو سېلاب ځپلو سره خپله خواخوږي هم څرګنده کړې ده.
ښاغلي کورومیا په دغه لیدنه کې له افغانستان سره د بشري او پرمختیایي مرستو له دوام او د افغان بزګرو لپاره د بدیلو کرکېلو پروژو د تطبیق ډاډ ورکړی.
ورته مهال د طالبانو د اقتصاد وزیر هم د جاپان د بشري مرستو هرکلی کړی او د پرمختیایي پروژو تطبیق یې د زراعت، روغتیا او زېربنایي برخو کې د کاري فرصتونو په برابرېدو، د خدمتونو په وړاندې کولو او د بې وزلۍ د کچې په کمېدو کې ګټور بللي.
جاپان یو له هغو محدودو هېوادونو په ډله کې دی، چې د طالبانو تر واک لاندې یې په افغانستان کې سفارت پرانیستی او د دغې ډلې د واکمنۍ پر مهال یې مېلیونونه ډالر د افغانستان له خلکو سره مرستې کړې دي.
