د طالبانو د کډوالو چارو وزارت وایي، چې د بغلان په سېلاب کې د هر مړه کس پر سر د هغه کورنۍ ته یو لک افغانۍ ورکوي. دغه وزارت د یوې خبرپاڼې په خپرولو سره ویلي، چې تر اوسه یې ۵۵ کورنیو ته له دولتي بودیجې څخه پیسې ورکړې دي.
په خبرپاڼه کې د خلیل الرحمن حقاني له قوله ویل شوي: "دغه مرستې اوسمهال د مرکزي بغلان ولسوالۍ اړوند ٥٥ کورنیو ته ورکړل شوې او د ټولو مړو شویو کورنیو ته به ووېشل شي."په بغلان ولایت کې د سختو سېلابونو د راوتلو له امله تراوسه د ۳۰۰ کسانو د وژل کېدو او د سلګونو نورو د ټپي کېدو خبر ورکړل شوی دی.د راپورونو له مخې؛ ښایي د قربانیانو شمېر تر دې هم زیات شي.د طالبانو د کډوالو چارو وزارت نغدي مرستو ته په کتو سره به د یاد شمېر مړو کورنیو ته شاوخوا دېرش میلیونه افغانۍ ورکړل شي.که څه هم په افغانستان کې طبیعي پېښې ډېرې رامنځته کیږي، خو زیانمنو کسانو ته بیا مرستې په عادلانه توګه نه رسېږي.ډېری وخت کومې ژمنې چې زیانمنو ته د مرستو د رسولو په برخو کې حکومت یا مرستندویه ادارې کوي، په سمه توګه نه رسېږي او یا هم په پراخه توګه پکې لاسوهنې کیږي.د راپورونو له مخې؛ د تېر کال په اکتوبر میاشت کې د هرات پرله پسې زلزلو کې ۱۵۰۰ کسان مړه او ۲۶۰۰ نور ټپیان شول او دغه راز په ۲۰۲۲ کال کې په پکتیکا او خوست ولایتونو کې مرګونې زلزلې وشوې، چې د نړۍوالو ادارو د مالوماتو له مخې؛ په دې زلزلو کې ۱۰۳۶ کسان مړه شول او ۲۹۴۹ نور ټپيان شول.د طالبانو سرپرست حکومت په هغه وخت کې یوازې د پکتیکا او خوست ولایتونو له زلزله ځپلو سره د مرستې لپاره ۱۰۰ میلیونه افغانۍ ځانګړې کړې وې.د طالبانو د حکومت ترڅنګ ډېرې نړۍوالې ادارې هم د مرستو لپاره لاس په کار شوې، خو د یادو ولایتونو زیانمن تراوسه هم له لسګونو ستونزو سره مخ دي او ان د سمې سرپناه له نشتون سره مخ دي.
