د اسراییل پوځ په غزه کې د ملګرو ملتونو د کارکوونکو په یوه موټر برید کړی، چې له امله یې د غزې د جګړې پر مهال د ملګرو ملتونو لومړنی بهرنی کارکوونکی ووژل شو. د ملګرو ملتونو سرمنشي انټونیو ګوترېش هم د دغې پېښې د "بشپړې څېړنې" غوښتنه کړې.
ښاغلي ګوترېش په اېکس پاڼه لیکلي:« نن په غزه کې د ملګرو ملتونو پر موټر برید شوی، چې زموږ یو همکار یې وژلی او بل یې ټپي کړی دی.»
هغه لیکلي، په غزه کې د ملګرو ملتونو تر ۱۹۰ ډېر کارکوونکي وژل شوي دي؛ خو بشري کارکوونکي باید خوندي شي.
هغه زیاته کړې:« زه د ملګرو ملتونو پر کارکوونکو ټول بریدونه غندم او د سمدستي اوربند او د ټولو یرغمل شویو د خلاصون لپاره خپله غوښتنه یو ځل تکراروم.»
ورته مهال د غزې د تړانګې سوېل په رفح او شمال کې په جبالیه کې سختې ځمکنۍ جګړې روانې دي، چې حماس پر اسراییلي ځواکونو او د هغو په زغرېوالو ګاډو د ډیرو بریدونو ادعا کړې ده.
د ملګرو ملتونو په وینا، تر دې دمه لږ تر لږه ۳۶۰زره فلسطینیان له رفح ښاره وتلي دي.
له بل پلوه سپینې ماڼۍ بیا ویلي، چې د امریکا د ولسمشر جوبایډن اداره په غزه کې د اسراییل لهخوا د فلسطینیانو وژنې ته د نسل وژنې په سترګه نه ګوري.
دې سره جوخت د منځني ختیځ لپاره د امریکا د پوځ مشر د غزې په اړه د خبرو لپاره اسراییل ته ورغلی.
