د پاکستان د پنجاب سروزیرې مریم نواز په اذلان شاه هاکي جام کې د پاکستان ملي ټیم د ځلېدو په بدل کې دې لوبډلې ته دېرش میلیونه کلدارې انعام ور کړ. پاکستانۍ لوبډلې د دې سیالیو نیمه پایلوبې ګټلو سره دویم مقام خپل کړ.
جیو نیوز د چهارشنبې په ورځ راپور ورکړ چې مریم نواز په لاهور کې د دې ټیم له لوبغاړو سره لیدلي.
په دې لیدنه کې مريم نواز وويل هاکي يواځې يوه لوبه نه ده، د قام وياړ دى، اوسنۍ لوبډلې د پخوانۍ لوبډلې یاد تازه کړ، د هاکي د پرمختګ لپاره به نه یوازې مرسته بلکې مالکیت به هم ور کوو.
د سلطان اذلان شاه هاکي کپ په ۳۰م پړاو سياليو کې د کوربه ماليزيا په ګډون پاکستان، کوريا، جاپان، نيوزيلنډ او کاناډا لوبډلې ولوبیدې.
په دې لوبو کې جاپان او پاکستان پایلوبې ته ووتل، خو جاپان مقابلې لوبډلې ته په ماتې ورکولو سره د لومړي ځل لپاره د اذلان شاه هاکي جام وګاټه.
د اسلام اباد سترې محکمې نن د پاکستان تحریک انصاف ګوند د مشر او پخواني لومړي وزیر د ۱۹۰ میلیونه پاونډو د درغلۍ د قضیې په تړاو د نوموړي ضمانت منظور کړ. د تحریک انصاف ځینې غړو پر دغه فیصله خوښي ښودلې او ویلې یې دي، چې خان ته جوړې شوې قضیې سیاسي رنګ لري او یوازې د تورونو تر کچې دي.
پاکستاني رسنیو د اسلام اباد د سترې محکمې د مشر قاضي عامر فاروق په حواله ویلي، چې عمران خان به د لس لکو کلدارو بانډ یا چېک قضايي ارګانونو ته سپاري او له مخې به یوازې په همدې قضیه کې د نوموړي ضمانت منظوریږي.
د عمران خان د حکومت له ړنګېدا وروسته پر نوموړي تور و، چې له دولتي ډالیو څخه یې په شخصي ډول استفاده کړې، دولتي رازونه یې بیان کړي او د عدت پر مهال یې له بشرا بي بي سره واده کړی دی.
د پاکستان پخواني لومړي وزیر عمران خان د مېرمنې بشرا بي بي د پخواني مېړه وکیل بیا تېره ورځ ویلي،چې خاور مانیکا غوښتل په عدت کې مېرمن بشرا ته رجوع وکړي.
خاور مانیکا پر عمران خان او خپله پخوانۍ مېرمن تور لګولی، چې د ده او بشرا د طلاق عدت یا ټاکلې نېټه پوره نه وه، چې عمران خان ورسره واده وکړ.
خو د عمران خان اوسنۍ مېرمنې بیا ویلي، چې پخواني مېړه یې خاور مانیکا په ۲۰۱۷ کال کې طلاق ور کړی و او له عمران خان سره یې په ۲۰۱۸ کې واده وکړ.
د افغانستان کرېکټ بورډ وايي، د راتلونکې جمعې په ورځ په ننګرهار کې د ميرویس نیکه جام په نوم د پنځو زونونو ترمنځ د کرېکټ درې ورځنۍ سيالۍ پيليږي. د لوبغاړو د غوراوي کمېټې د غړو په خبره، د څلورم پړاو دغه درې ورځنۍ سيالۍ د استعدادونو د روزولو په هدف تر سره کېږي.
د افغانستان کرېکټ بورډ وايي، د میرویس نیکه جام سيالۍ به ۱۹ ورځي دوام وکړي.
دغه سيالۍ د غازي امان الله خان او شهيد نجیب الله ترکۍ پر لوبغالو کېږي، چې پکې به شاوخوا ۱۰۰ لوبغاړي ولوبيږي.
د کرېکت بورډ غوراوي کمېټې غړی میر مبارز وايي، چې د لوبو لپاره یې لوبغاړو ته ځيني شرايط هم ايښي تر څو نوي لوبغاړي د کرېکټ له نړیوالو او نويو اصولو سره بلد شي.
مبارز زياتوي: « په دې لوبو کې ټولو لوبغاړو ته چانس ورکول کیږي، ټول لوبغاړي مساوي او پر خپل ځای به لوبه کوي، توپوهونکی، توپ اچوونکی او الراونډر بر پر خپل ځای لوبيږي او پايله به یې ښه وي.»
د مبارز په خبره، چې هره لوبډله کې به درې احتياطي وي او لوبډله به له پنځلسو لوبغاړو جوړه وي.
کرېکت بورډ تېره اونۍ په کابل کې د قوش تېپې جام په نوم د پنځو زونونو تر منځ د کرېکټ شل اوريزه سيالۍ پای ته ورسولې، چې بند امير لوبډلې پکې اتله شوه
د پکتیا په ځاځي اریوب ولسوالۍ کې له ډیورنډ کرښې سره نږدې په سپینه شګه کې د طالبانو او پاکستاني ځواکونو ترمنځ له نیم ساعت راهیسې جګړه روانه ده. سرچینې وايي، پاکستاني ځواکونو غوښتل په دغه سیمه کې پوسته جوړه کړي، خو د طالبانو سرحدي ځواکونه یې خنډ شول او له امله یې جګړه ونښته.
افغانستان انټرنشنل ته رسېدلو ویډیوو کې د ډزو غږونه اورېدل کېږي. لا هم په دغه جګړه کې د مقابلو اړخونو یا د ولسي مرګ ژوبلې رپوټ نه دی ور کړل شوی.
د طالبانو او د پاکستان حکومت هم لا په دې تړاو څه نه دي ویلي.
دوه ورځې مخکې هم په دغه سیمه کې د پاکستاني ځواکونو او طالبانو ترمنځ نږدې یو ساعت جګړه روانه وه.
که څه هم طالبانو او پاکستاني ځواکونو رسمي څه ونه ویل، خو ځايي خلکو ویل چې جګړه پاکستاني ځواکونو پیل کړې وه.
څو میاشتې مخکې د پاکستاني پوځ له خوا په تورخم دروازه او تر هغه مخکې کونړ ته څېرمه سرحدي سیمه کې د پوستې جوړولو له امله هم د پاکستاني پوځ او طالبانو نښتې شوې وې.
یو شمېر پخوانیو امریکايي چارواکو په یوې نوې څېړنه کې ویلي، چې امریکا باید د افغانستان د جګړې ترخې خاطرې یوې خواته کړي او په افغانستان او پاکستان کې د ترهګرو ډلو پر ضد اقدامات زیات کړي. دوی دا هم ویلي، چې د دې طرحې موخه په افغانستان کې د امریکا راتګ او مداخله نه ده.
د فرانسې خبري اژانس د راپور له مخې، دغو پخوانیو جګپوړو چارواکو په دې څېړنه کې چې د سې شنبې په ورځ د امریکا د سولې د مطالعاتو د انسټیټیوټ له خوا خپره شوې، په افغانستان کې د ترهګرو ډلو د بیا را ژوندي کېدو په اړه اندېښنه ښودلې او ویلي یې دي چې په افغانستان کې افراطي خوځښتونو د تنظیم او د ځواکونو د تازه کولوفرصت پیدا کړی.
دوی ویلي چې امریکا له افغانستان څخه تر وتلو وروسته له چین سره سیالۍ او په اوکراین کې جګړې ته زیاته پاملرنه کړې ده. په ورته وخت کې ترهګرو ډلې د افغانستان له خاورې په استفادې د امریکا او د هغې د متحدینو د ګټو د ګواښلو لپاره اړین ځواک ترلاسه کړی دی.
دوی د داعش خراسان څانګې او تحریک طالبان پاکستان ته په اشارې سره وویل، چې د افغانستان له خاورې په استفادې سره سیمه ییز ګواښ ګرځېدلی دی.
دغو پخوانیو سیاستوالو د امریکا له متحدو ایالتونو غوښتي چې په افغانستان کې د ترهګرۍ ګواښونه په ګوته او له منځه یوسي.
دوی له متحده ایالاتو غوښتي چې د "ځواک نمایش" لکه د بې پیلوټه الوتکو الوتنې دې په پام کې ونیسي ترڅو په طالب مشرانو فشار راوړي چې له القاعدې سره اړیکې پرې کړي.
تر دې وړاندې هم د افغانستان په اسمان د امریکايي بې پیلوټه الوتکو د الوتنو راپورونه موجود و. طالبانو د افغانستان په اسمان د بې پیلوټه الوتکو ګزمې تایید کړې او ویلي یې دي چې امریکا د دغه هېواد له هوايي حریم څخه سرغړونه کوي.
له پاکستان سره له همکارۍ پرته بله چاره نشته؟
دغو چارواکو کې چې د امریکا دوه پخواني سفیران هم شامل دي، له اسلام اباد سره د واشنګټن د همکارۍ غوښتنه وکړه.
دوی وویل: "د ۲۰۲۱ کال په اګست میاشت کې دغه هېواده د ځواکونو له اېستلو وروسته په افغانستان کې د نفوذ او استخباراتي کړیو د کمښت په پام کې نیولو سره، واشنګټن باید د افغانستان د جګړې له شل کلنې صدمې باید ووځي او له ترهګرۍ سره په مبارزه کې دې له پاکستان سره همکاري وکړي."
دوی امریکا هڅولې چې د پاکستان له هوايي حریم څخه د ترهګرو د تعقیب لپاره کار واخلي.
خو د بایډن حکومت له اسلام اباد سره خبرو ته ډېره لېوالتیا نه لري. پاکستان کې ګډوډ حالاتو هم د واشنګټن «نه لېوالتیا» زیاته کړې ده.
د امریکا او پاکستان اړیکې په تېرو دوو لسیزو کې له کړاوونو ډکې وې. امریکا پر پاکستان تور پورې کړی چې له ترهګرۍ سره په مبارزه کې «دوه ګونې لوبه» کوي.
د دې څېړنیزې ډلې مشر لورل د فرانسې خبري اژانس ته وویل: «د امریکا د حکومت په لوړه سطحه ډېر خلک اوس د افغانستان د جګړې د شل کلنې تجربې پر بنسټ له پاکستان څخه سخت نفرت لري.»
هغه، چې د افغانستان او پاکستان لپاره د امریکا د ځانګړي استازي په توګه کار کړی، د فرانسې خبري اژانس ته وویل، « پاکستان له متحده ایالاتو سره صادقانه چلند نه دی کړی.»
هغه وویل، «مګر ځینې نه بدلیدونکي حقایق شتون لري، داچې پاکستان د افغانستان ګاونډی دی، چې دا مهال د ترهګرو ډلو پټنځای دی. نو زه فکر کوم چې له پاکستان سره د داسې اړیکو لرلو پرته بله چاره نشته چې متحده ایالات وکولای شي په سیمه کې خپلې ګټې خوندي کړي.
نوموړي ویلي، چې د پاکستان په اړه د امریکا تګلاره هم د هند تر اغېز لاندې ده، چې له پاکستان سره تاریخي دښمني لري.
په دې څېړنه کې چې د امریکا د سولې انسټیټیوټ په همکارۍ ترسره شوې، د افغانستان او پاکستان لپاره د امریکا د متحدو ایالتونو د پخواني ځانګړي استازي لورل میلر سربېره، د پوځ متقاعد جنرال مایکل په پاکستان او افغانستان کې د امریکا پخوانیو سفیرانو انه پټرسون او مایکل مک کینلي ګډون درلود.
د پاکستان تر واک لاندې کشمیر کې د مدني حقونو د ډلو ټلواله وايي؛ اسلام اباد یې غوښتنې منلې دي، ځکه نورې مظاهرې نه کوي.
تېرو ورځو کې د دې مظاهرو او تاوتریخوالي له امله د یوه پولیس په ګډون څلور کسان ووژل او تر سلو ډېر ټپیان شول.
د رویټرز د راپور له مخې؛ د ټلوالې مشر شوکت نواز میر صوبايي مرکز مظفر اباد کې د پرېکړې اعلانولو سره وویل:«حکومت زموږ ټولې غوښتنې منلې دي. »
نوموړي پر لاریونوالو غږ وکړ، چې کورونو او کاروبار ته ستانه شي.
نوموړي له حکومت وغوښتل چې د درېیو وژل شویو لاریونوالو او یوه پولیس د کورنۍ مالي ملاتړ ومني.
دا مظاهرې له هغه وروسته بندېږي چې د پاکستان لومړي وزیر شهباز شریف د اوړو او برېښنا بېل د سبسایډي په ګډون د لاریونوالو د ډېری غوښتنو د ځوابولو لپاره د ۸۶ میلیونه ډالرو منظوري وکړه.
شهباز شریف دا هم ویلي، چې په نږدې ورځو کې به کشمیر ته لاړ شي او هلته به له نږدې حالات وګوري.
نوموړي په کابینه کې نن دا هم وویل، چې د ایتلافي حکومت د ټولو شریکانو په مشوره یې کشمیر ته پیسې ځانګړې کړې دي.