د چین او روسیې ولسمشرانو ولادیمیر پوتین او شي جېن پېنګ په یوې ګډه اعلامیه کې ټینګار کړی، چې امریکا او ناټو ته نه ښايي چې یو ځلې بیا دې په افغانستان کې د پوځي بنسټونو لپاره هڅه وکړي.
په دغې اعلامیه کې دا رنګه ویل شوي، چې هغوی باید په افغانستان کې د ټولنیزو او اقتصادي ستونزو پړه په غاړه واخلي.
د ولادیمیر پوتین او شي جېن پېنګ ګډه اعلامیه د پنجشنبې په ورځ د (غويي ۲۷مه) د کرېملېن په سایټ کې خپره شوه.د روسیې او چین د ولسمشرانو د اعلامیې په یوه برخه کې په افغانستان کې د امریکا او ناټو شل کلن حضور ته د «اشغال» نوم ورکړل شوی.د امریکا لهخوا د افغانستان د مالي زېرمو ازادېدل، د چین او روسیې د ولسمشرانو یوه بله غوښتنه ده چې په اعلامیه کې یې یادونه شوې.ولادیمیر پوتین او شي جېن پېنګ ټینګار کړی: «امریکا او ناټو چې د افغانستان په ۲۰ کلن اشغال کې پړه دي، نه ښايي چې یو ځلې بیا دې د افغانستان د پوځي جوړښتونو لپاره هڅې وکړي. هغوی باید د افغانستان د اوسنیو ټولنیزو او اقتصادي ستونزو مسوولیت ومني.»په اعلامیه کې راغلي، چې امریکا او ناټو دواړه باید له جګړې وروسته د افغانستان د بیارغاونې ملاتړ وکړي او «د افغانستان د ملي بندو شویو پانګو په ازادولو کې دې خپل ټول وس وکاروي.»د دغې اعلامیې له مخې، د روسیې او چین ولسمشرانو د افغانستان سره پر دوه اړخیزو او څو اړخیزو همکاریو ټینګار وکړ او غوښتنه یې وکړه، چې داسې یو افغانستان باید جوړ شي چې خپلواک، بې پرې، سولهییز او د ترهګرۍ او نشهیي توکو څخه پاک وي.د دغه کار لپاره ولادیمیر پوتین او شي جېن پېنګ د مسکو پر فارمټ او د شانګهای د همکاریو سازمان پر ونډې ټینګار وکړ او ویې ویل، چې له دغو لارو د افغانستان سیاسي ستونزې غوڅېدای شي.د روسیې ولسمشر ولادیمیر پوتین د پنجشنبې په سهار د (غویي ۲۷مه) بیجېنګ ته تللی. دا د ولادیمیر پوتین د ولسمشري د پنځمې دورې لومړنی سفر دی چې چین ته یې کوي.ښاغلي پوتین له شي جېن پېنګ څخه د «ستراتیژیک مشارکت» له امله مننه کړې.
