د رویټرز خبري اژانس د اسپانیا د بهرنیو چارو وزارت له حوالې په خپل یوه راپور کې ویلي، چې د بامیان په پروني برید کې د دغه هېواد درې وګړي وژل شوي او یو بل یې ټپي شوی.
تېره ورځ ناپېژاندو وسلهوالو د بامیان په ښار کې په بهرنیو او افغان وګړو ډزې وکړې.
د طالبانو د کورنیو چارو وزارت وایي، چې په دغې پېښه کې د یو افغان په ګډون درې بهرنیان وژل شوي دي.د دغه وزارت د ویاند په وینا، په دغه پېښه کې څلور نور بهرنیان او درې افغانان ټپیان شوي هم دي.د طالبانو د کورنیو چارو وزارت وايي، چې د دغې پېښې په تړاو یې څلور کسه نیولي دي؛ خو د بهرنیانو د هویت په اړه یې څه نه وو ویلي.له بل پلوه د امريکا د نيويارک ټايمز ورځپاڼې په راپور کې هم راغلي، چې په باميان کې د تېرې ورځې په پېښه کې وژل شوي درې بهرنيان اسپانويان دي.نیویارک ټایمز په بامیان ولایت کې د طالبانو د اطلاعاتو او فرهنګ د مشر سیف الله ریاض له قوله ویلي، چې وژل شوي بهرنیان د اسپانیا اوسېدونکي دي.تر اوسه کومې ډلې د پېښې پړه پر غاړه نه ده اخیستې.ورته مهال د افغانستان لپاره د امریکا ځانګړي استازي ټام وېسټ په بامیان ولایت کې د پروني بربد په اړه خواشیني څرګنده کړې.نوموړي په اېکس پاڼه لیکلي:« موږ په بامیان ولایت کې په هغه برید خواشیني یو، چې په کې ملکي افغانان او بهرنيو وګړو ته مرګ ژوبله اوښتې .»د هغه په وینا:« زموږ فکر له هغو کسانو سره دی، چې په دغه برید کې یې خپل خپلوان له لاسه ورکړي.»هغه د خپلو خبرو په وروستۍ برخه کې لیکلي، تاوتریخوالی د حل لاره نه ده.
