سېف د چېلډرن: په بغلان کې سېلابونو ماشومان تر نورو زیات اغېزمن کړي چې لاسنیوي ته اړتیا لري
د ماشومانو د ژغورنې نړۍواله اداره وايي، په بغلان ولایت کې وروستیو سېلابونو ګڼ ماشومان بېکوره کړي او د سر پناه کولو لپاره په کنډوالو او بېدیاو کې ژوند تېروي.
د ماشومانو د ژغورنې نړۍواله اداره وايي، په بغلان ولایت کې وروستیو سېلابونو ګڼ ماشومان بېکوره کړي او د سر پناه کولو لپاره په کنډوالو او بېدیاو کې ژوند تېروي.
دغې ادارې په خپل وروستي راپور کې ویلي، د ماشومانو او مېرمنو سره د مرستې په پار یې په بغلان کې کرځنده روغتیايي کلینیک جوړ کړی چې د ښځینه او نارینه ډاکټرانو تر څنګ د رواني ناروغیو متخصصین هم په کې کار کوي.
دغه بنسټ دا رنګه ویلي، چې د بغلان په سېلاب ځپلو سیمو کې ماشومان پاکو اوبو ته لاسرسی نه لري چې له همدې امله دمګړۍ ځیني ماشومان د نس په ناروغیو اخته شوي دي.
دغه بنسټ دا رنګه ویلي، چې په تېرو څو ورځو کې یې خوراکي توکي، دارو درمل او کمپلې پر اړمنو خلکو وېشلې دي.
په افغانستان کې د دغه بنسټ مشر ارشد مالک وايي: سېلابونه د لنډمهاله ستونزو تر څنګ اوږدمهاله کړاوونه هم رامنځته کوي او مرستندویه ټولنو ته په کار دي، چې په دې برخه کې دوامدارو مرستو ته دوام ورکړي.
هغه وایي، دا مهال سېلاب ځپلي ماشومان تر هر څه زیات پاکو اوبو ته اړتیا لري چې په دې توګه د ناروغیو مخنیوی او په راتلونکي کې د یو بل کړاو مخه پرې نیول کېدای شي.
نوموړي دا رنګه له سېلاب ځپلو سره د رواني درملنې په برخه هم ټینګار کړی، ځکه د هغه په خبره هغو ماشومانو چې خپل خپلوان یې په سېلابونو کې وژل شوي او ودان کورونه یې نړیدلي له دې امله سخت کړېږي او دوامداره ملاتړ ته اړتیا لري.
د ماشومانو د ژغورنې نړۍواله اداره وايي، چې په تېرو درې ورځو کې یې ۵۰ زره لیټره پاکې اوبه پر سېلاب ځپلو کورنیو وېشلې دي.
