د طالبانو له بندخونو د شکنجو د راپورونو سربېره دغه ډله وايي، په زندانونو کې شکنجې نه شته
سره له دې، چې د طالبانو له بندخونو څخه د شکنجو راپورونه په ځلونو خپاره شوي؛ خو دا ډله وایي، چې د دوی په بندخونو شکنجې نه شته.
سره له دې، چې د طالبانو له بندخونو څخه د شکنجو راپورونه په ځلونو خپاره شوي؛ خو دا ډله وایي، چې د دوی په بندخونو شکنجې نه شته.
د بندخونو د چارو د سمون ادارې نظامي مرستیال حبيبالله بدر په کابل کې په یوې غونډه کې د وینا پرمهال زیاته کړه، چې د هېواد په هېڅ بندخونه کې څوک د شکنجو مساله ثابتولی نه شي.
نوموړی وایي: "د هېواد په ټولو بندخونو کې بندیان له مونږ سره د هغوی د کورنیو امانت دي."
ښاغلی بدر زیاتوي، چې دوی هڅه کوي بندیان د حرفوي زده کړو په تر لاسه کولو سره د حافظ او استاد په توګه ټولنې ته وړاندې شي.
د بندخونو چارو د سمون ادارې نظامي مرستیال همداراز ټینګار کوي، چې د بندیانو لپاره به نورې اسانتیاوې هم برابرې شي.
نوموړی دغه څرګندونې په داسې حال کې کوي، چې د غويي په ۱۳مه افغانستان انټرنشنل د څرخي پله زندان د وضعیت په اړه په یوه ځانګړي راپور کې ليکلي، چې طالبانو لسګونه سیاسي بندیان وهلي او ځورولي دي.
سرچینې وايي، چې لا هم طالبانو د بندیانو له ځورولو لاس نه دی اخیستی.
د دغه راپور له خپرېدو وروسته د سره صليب نړۍوالې کمېټې افغانستان انټرنشنل ته په غبرګون کې وويل، چې د طالبانو له بندخونو څخه ليدنه کوي؛ خو څرګنده يې کړه، چې له طالبانو سره پټې خبرې او راټول شوي معلومات او موندنې به د ماهيت له امله خپرې نه کړي.
د راپورونو له مخې؛ په بندخونو کې د طالبانو ظلم او ربړونې دوام لري او د بنديانو کورنۍ وايي، چې له دوى سره د طالبانو چلند ډېر بد او له تاوتريخوالي ډک دى.
طالبانو د عمومي عفوې له اعلان سره سره په د تېر نظام لسګونه پخواني سرتیري او کارکوونکي بندیان کړي دي.
ویل کیږي، چې یو شمېر کسان ان ددغو شکنجو له امله ژوند هم له لاسه ورکړی دی.
د یوناما په ګډون د بشري حقونو بنسټونو د طالبانو په بندخونو کې د ځورولو خبرونه تایید کړي دي.
