طالبانو له پنځه میاشتني ځنډ وروسته د ۱۴۰۳ لمریز مالي کال ملي بودیجه تایید کړه
له قانوني نېټې نېږدې پنځه میاشتې تېریږي، چې د طالبانو مشر ملا هبت الله اخوندزاده د افغانستان د ۱۴۰۳ لمریز مالي کال ملي بودیجه تایید کړه.
له قانوني نېټې نېږدې پنځه میاشتې تېریږي، چې د طالبانو مشر ملا هبت الله اخوندزاده د افغانستان د ۱۴۰۳ لمریز مالي کال ملي بودیجه تایید کړه.
ذبیح الله مجاهد د سې شنبې په ورځ (د غبرګولي لومړۍ) پر اېکس پاڼه لیکلي، چې د افغانستان د ۱۴۰۳لمریز مالي کال ملي بودیجه د ملا هبت الله اخوندزاده له خوا له هر اړخیز غور او دقت وروسته توشیح شوه.
ښاغلی مجاهد زیاتوي: «د روان مالي کال په ملي بودیجه کې د خلکو اړتیاوې او لومړیتوبونه په پراخه کچه په پام کې نیول شوي او همدارنګه د سږ کال ملي بودیجه به هم لکه د تېر کال له خپلو کورنیو عوایدو څخه چمتو شوې ده.»
ذبیح الله مجاهد وایي، د مالیې وزارت به د ۱۴۰۳ مالي کال ملي بودیجه د هېواد په مالي سیستم کې ځای پر ځای کړي.
هغه زیاتوي: « د روان مالي کال اړوند ټولو (عادي او انکشافي) برخو ته به په پوره روڼتیا سره په نورمال ډول رسیدګي وشي.»
نوموړي د بودیجې اندازه او جوړښت نه دی روښانه کړی.
پر طالبانو نیوکه ده، چې د ملي بودیجې په اړه د افغانستان خلکو ته معلومات نه ورکوي او د افغانستان د بودیجې یوه لویه برخه دوی د خپلو وسله والو په تمویل لګوي.
