د ملګرو ملتونو د سرمنشي مرستیال وایي، په افغانستان کې د ناچاوده توکو د پاکولو لپاره د یوې بنسټیزې حل لارې د موندنې له هڅو ملاتړ کوي. ژان پیر لاکروا ویلي، چې تېرکال په افغانستان کې ۸۰۰ کسان د ماینونو او چاودېدونکو توکو په چاودنو کې وژل شوي دي.
د ملګرو ملتونو دغه چارواکي د سه شنبې په ورځ ( د غبرګولې لومړۍ نېټه) په اېکس پاڼه افغانستان ته د خپل سفر د ختمېدو خبر ورکړی دی.
د ملګرو ملتونو د سرمنشي مرستیال ژان پیر لاکروا لیکلي:« تازه له افغانستانه راستون شوم. هلته چې چاودېدونکو توکو پر خلکو کې وېره او ترهه خپره کړې ده.»
ښاغلي لاکروا همدارنګه ټینګار کړی، چې په افغانستان کې تېرکال د ماینونو او چادېدونکو توکو د چاودنو ډېری قربانیان ماشومان وو.
د ملګرو ملتونو د سرمنشي مرستیال د دغه سازمان له خبري سرویسه په خپره شوې ویډیو کې ویلي:« افغانستان د څو لسیزو لپاره د ماینونو له ستونزې سره مخ دی، چې په دې برخه کې د خلکو عامه پوهاوی او د مهارتونو رامنځته کول ګټور وو.»
ژان پیر لاکروا وایي، په افغانستان کې د جګړو له پاتې شونو څخه په سلګونه ډوله ناچاوده توکي پر ځای پاتې دي.
نوموړی د چهارشنبې په ورځ (د غویي ۲۶مه) د ناچاوده توکو په اړه د پوهاوي لپاره د سولې په عملیاتو کې د ګډون په موخه کابل ته تللی و.
په تېرو وروستیو کې په افغانستان کې د ملګرو ملتونو د بشري مرستو همغږي کوونکي وویل، چې په پراخه کچه ځمکه لاهم په چاودېدونکو توکو ککړه ده چې د دغه هېواد د وګړو ژوند ګواښوي.
