د طالبانو ویاند ذبیح الله مجاهد د سیګار د راپور په ردولو سره ویلي:« مالیات، لګښتونه، د اوبو او برېښنا لګښت او ګمرکي مالیات د افغانستان د حکومت ملي بودجې پورې اړه لري او موږ د بهرنیو موسسو له بشري مرستو څخه د ناوړه کارونې ادعاوې ردوو.»
ذبیح الله مجاهد دغه څرګندونې د افغانستان د بیارغونې لپاره د امریکا د ځانګړې ادارې د نوي راپور په غبرګون کې کړې او زیاته کړې یې ده، چې طالبان د بهرنیو بنسټونو په بشري چارو کې هیڅ ډول لاسوهنه نه کوي.
هغه د طالبانو تر کنټرول لاندې ملي راډیو ته ویلي، چې دوی د نړۍوالو بنسټونو د امنیت په ټینګولو مکلف دي او یوازې د دغو بنسټونو د کارونو څارنه کوي.
له بل پلوه سیګار ویلي، چې د امریکا همکارو موسسو طالبانو ته له لس ېیلیون ډالرو زیاته مالیه ورکړې ده.
سیګار په خپل راپور کې لیکلي، دغو بنسټونو طالبانو ته د اوبو او برېښنا د خدمتونو، ګمرکي مالیاتو او نورو برخو کې ۱۰.۹ مېلیونه ډالر ورکړي دي.
په دغه راپور کې په افغانستان کې د مرستندویه بنسټونو بشري مرستو ته د مالیې له ورکولو څخه د طالبانو د ګټې او د دغو سازمانونو لهخوا د کره راپور ورکولو د نشتوالي په اړه یې څېړنه کړې ده.
سیګار وایي، د امریکا متحده ایالاتو د ۲۰۲۱ کال له اکټوبر څخه تر ۲۰۲۳ کال د سپټمبره پورې له افغانستان سره څه باندې ۱.۶ مېلیارډ ډالره مرسته کړې ده.
