ذبیح الله مجاهد: د طالبانو پخواني مشر له افغانانو سره پر تعامل باور درلود
د طالبانو ویاند د اختر محمد منصور د مړینې د تلین په مناسبت وویل، چې د طالبانو پخواني مشر له افغانانو سره د خبرو پر اړتیا باور درلود.
د طالبانو ویاند د اختر محمد منصور د مړینې د تلین په مناسبت وویل، چې د طالبانو پخواني مشر له افغانانو سره د خبرو پر اړتیا باور درلود.
د نوموړي په خبره منصور د دغې تګلارې بنسټګر و، چې په افغانستان کې د امريکا په حضور کې د سولې راتلل ناشوني او د امريکا له وتلو وروسته دې له افغانانو سره خبرې وشي.
طالبانو د سه شنبې په په ورځ د خپل دوهم مشر د مړینې تلین ولمانځه.
اختر منصور په ۱۳۹۵م کال پر همدې ورځ په پاکستان کې د امریکا د بې پیلوټه الوتکې په برید کې ووژل شو.
د طالبانو ویاند وايي، چې افغانستان ته د امریکا له راتګ وروسته ملا عمر پټ شو او ملا منصور د طالبانو د ځواکونو د قوماندې او همغږۍ مسوولیت په غاړه واخیست.
د نوموړي په خبره، ملا عمر به د منصور سره د لیک له لارې اړیکې نیولې.
ذبیح الله مجاهد ملا عبدالغني برادر هم د امریکا له برید وروسته د طالبانو په بیا تنظیمولو کې یو له مهمو شخصیتونو بللی دی.
د طالبانو ویاند وايي، ملا منصور په دې وتوانید چې طالبان په داسې ډول تنظیم کړي چې د ملا عمر له مرګ وروسته هم دغه تحریک ونه پاشل شي.
په ۲۰۲۰ کال کې له امریکا سره د دوحې د هوکړې په ترڅ کې طالبانو هم منلې وه، چې له افغان لوري سره خبرې وکړي؛ خو له هغې وروسته، چې پر افغانستان یې د واک منګولې ټینګې کړې بیا یې وویل، چې د افغانستان د روانو حالاتو ته په پام دا مهال د تعامل اړتیا نه لیدل کېږي او د طالبانو حکومت ټول ګډونه دی او د خلکو ملاتړ له ځانه سره لري.
