د ملګرو ملتونو د بشري مرستو د همغږۍ دفتر د قطر له خیریه سازمان سره د لسو میلیونو ډالرو د مرستې د هوکړې د لاسلیک خبر ورکړ. دا هوکړه لیک له ناورینونو او جګړو څخه زیانمنو سیمو کې د اوچا او د بېړني غبرګون له مرکزي صندوق څخه د بشري فعالیتونو د ملاتړ په موخه لاسلیک شوی دی.
اوچا د چهارشنبې په ورځ د یوې اعلامیې په خپرولو سره ویلي، چې دا تړون د قطر د حکومت او د ملګرو ملتونو د بشردوستانه مرستو د همغږي دفتر تر منځ د ستراتیژیکو خبرو اترو په څنډه کې لاسلیک شو.
اوچا د قطر د خیریه سازمان د مدیر یوسف الکواري له قوله لیکلي: «بشردوستانه سازمانونه اړمنو ټولنو ته د لاسرسي له محدودیت سره مخ دي او د بشري مرستو د لېږلو په برخه کې له خنډونو سره لاس او ګرېوان دي.»
نوموړي د افغانستان، غزې، سوریې، یمن او سوډان بشردوستانه وضعیت ته په اشارې سره وویل، چې په دې هېوادونو کې اړمنو کسانو ته لاسرسی محدود دی.
یوسف الکواري دغه راز زیاته کړه: « په داسې حال کې چې پر بشري مرستو ټینګار کوم، باور لرم چې دا امر ځانګړی ارزښت لري، په ځانګړي توګه په افغانستان، غزه او سوډان کې چې له پېچلو تاوتریخوالو او جګړو سره مخ یو.»
د مالي مرستو هوکړه لیک د ملګرو ملتونو د عمومي منشي د مرستیال مارتین ګریفیس او د قطر د خیریه سازمان د اجرایي مدیر یوسف الکواري ترمنځ لاسلیک شوی دی.
