د ترکیې اناتولي خبري اژانس د ابراهیم رییسي او ورسره د مل پلاوي د چورلکې د غورځېدو په اړه په یوه مطلب کې د دې پېښې احتمالي سناریو ګانې څېړلې دي. دغه خبري اژانس لیکلي، چې د ایران د مخکیني ولسمشر د چورلکې په غورځېدو کې کورني اختلافونه باید له پامه و نه غورځول شي.
د ترکیې دې دولتي رسنۍ د یوه تحلیل له مخې د ابراهیم رییسي د چورلکې غورځېدل سیاسي اختلافونو پورې تړلي بللي دي.
دغې رسنۍ لیکلي، چې د ابراهیم رییسي مړینې د علي خامنه یي د زوی مجتبا خامنه یي د پلار د ځای ناستي کېدو چانس زیات کړی او د حکومت په یووالي سره د واک د لېږد لاره هواروي.
د تحلیل په یوه برخه کې راغلي، چې په یوه غرنۍ سیمه او په خرابه هوا کې د یوې ډېرې زړې چورلکې د الوتلو پرېکړه څو اوازې پیاوړې کوي.
اناتولي خبري اژانس د ایراني کارپوهانو د نظر په وړاندې کولو سره د دغې چورلکې په غورځېدو کې د بهرنیو لاسونو احتمال هم په ګوته کړی دی.
په تحلیل کې راغلي: «که څه هم په دې اړه هیڅ کوم معلومات، توضیحات او ادعا نشته، خو ور سره ذهن ته دا رسېږي چې د اسراییل او ایران ترمنځ به ترینګلتیا زیاته شي، خو اسراییل په اسانه انکار ترې هم کولی شي.»
د دې تحلیل لیکونکی حقي اویغور لیکلي: «که دا پېښه ناڅاپي وي د سیمې په وضعیت به هیڅ کومه اغېزه و نه لري، نوی ولسمشر د اساسي قانون پربنسټ ټاکل کیږي او ددې هېواد کورني او بهرني پېژندل شوي سیاستونه به دوام ولري.»
ښاغلي اویغور دغه راز لیکلي، چې په ایران کې د اساسي سیاستونو ټاکل د اسلامی جمهوریت د رهبر مسوولیت دی، نه د ولسمشر.
