د ترکیې ټي ار ټي خبري اژانس نن راپور ورکړ، چې د دې هېواد امینتي ځواکونو له داعش سره د همکاري په تور ۱۵ کسان نیولي دي. د راپورونو له مخې، له دې کسانو ۱۳ تنه په استانبول ښار او د یادې ډلې دوه قومندانان په کرشهر کې نیول شوي دي.
د ټي ار ټي خبري اژانس د راپور له مخې، د ترکیې څارنوالۍ د دغو کسانو د نیولو حکم صادر کړی و او اوس یې زندان ته ولېږدول.
دا په داسې حال کې ده، چې ترکي رسنیو د پنجشنبې په ورځ لیکلي چې د دغه هېواد پولیسو د کرشهر په ښار کې تر څار لاندې د داعش دوه قوماندانان پېژندلي او نیولي دي.
په راپورونو کې نیول شوي کسان عراقي وګړي ښودل شوي دي.
د ترکیې سوزجو رسنۍ لیکلي، چې د داعش دا دوه قومندانان په عراق کې د امنیتي ځواکونو په وړاندې په وسله والو بریدونو کې برخه درلوده
ترکیې په ۲۰۱۳ کال کې داعش ډله ترهګره وبلله.
د ترکي رسنیو د راپورونو له مخې، له هغه وخت راهیسې په ترکیه کې د دغې ډلې له خوا په لږ تر لږه ۱۰ ځانمرګو او وسله والو بریدونو کې څه باندې ۳۰۰ کسانو ته مرګژوبله اوښتې ده.
ترکیې په وروستیو میاشتو کې په ټول هېواد کې د پراخو عملیاتو په ترڅ کې په داعش ډلې پورې اړوند سلګونه شکمن کسان نیولي دي.
تر دې مخکې د ترکیې د کورنیو چارو وزارت ویلي و، چې د دغه هېواد امنیتي ځواکونو په تېرو دوو میاشتو کې د داعش پر وړاندې د یو زرو ۴۲۲ عملیاتو په ترڅ کې دوه زره او ۹۹۱ کسان د دغې ډلې د غړیتوب په تور نیولي دي.
