دغه غورځنګ د یوې خبرپاڼې په خپرولو سره ادعا کړې، طالبانو په وروستیو کې د هغو حسابونو له لارې چې دغې ډلې رامنځته کړي له مرستندویه بنسټونو غوښتي چې په افغانستان کې له سېلاب ځپلو سره مرسته وکړي.
دغه غورځنګ وایي، دغه وړاندیز داسې مهال کېږي چې نږدې درې کاله کېږي دغه ډله د مالیې، عشر او زکات په نوم له خلکو پېسې ټولوي، ټول کورني عواید په لاس کې لري، هره اونۍ له امریکا د بشري مرستو په نوم څلور مېلیونه ډالر ترلاسه کوي؛ خو لا تراوسه یې له سېلاب ځپلو سره کومه ګټوره مرسته نه ده کړې.د دغه غورځنګ په وینا، سېلاب ځپلي او په ځانګړې توګه ښځې او ماشومان په بد وضعیت کې دي او بېړنیو مرستو ته اړ دي.دغه غورځنګ لیکلي، طالبانو د نړۍوالې ټولنې سره د ژمنې خلاف له ترهګرو ډلو سره خپلې اړیکې نه دي پرې کړي او د دوی بانکي حسابونو ته د پیسو لېږد د ترهګرو ډلو د پیاوړتیا لامل ګرځېدای شي.دوی له ټولو مرستندویه بنسټونو غواړي، چې پر طالبانو باور ونه کړي او دغه مرستې د طالبانو پرځای په بغلان، غور، تخار، بدخشان، هرات او نورو ولایتونو کې په مستقیمه توګه د زیانمنو شویو او په ځانکړې توګه د ښځو او ماشومانو په واک کې ورکړي.دغه غورځنګ وایي، طالبانو د سیګار راپور په ردولو سره د ۱۴۰۳کال لپاره د بودجې په توشیح کولو سره ویلي، چې دغه بودجه یې له کورني عوایدو تامین کړې ده.دوی زیاتوي، چې د طالبانو بانکي حسابونو ته د مرستو لېږد د طالبانو د حکومت په رسمیت پېژندلو په مانا ده او دا د خلکو په حق کې ستره جفا ده.دوی غواړي، چې د مرستو د وېش له بهیره دې سمه څارنه وشي.
