د ازموینو ادارې لپاره د طالبانو رییس عبدالباقي حقاني وايي، سږکال د کانکور ازموینه په پنځه پړاوونو کې اخلي او د پښتو او دري سربېره به په عربي او انګلیسي ژبو هم دغه ازموینه اخیستل کېږي.
حقاني د پنجشنبې په ورځ د (غبرګولې ۳مه) د یوې رسنیزې ناستې پرمهال خبریالانو ته ویلي، سږکال د کانکور عمومي ازموینه په پنځه پړاوونو کې اخلي.نوموړی وايي:« لومړی پړاو ازموینه د غبرګولې میاشتې په ۱۷،۱۸، او ۱۹مه نېټه دویم پړاو د چنګاښ په لومړۍ او دوهمه نېته، درېیم پړاو د چنګاښ په ۷ او ۸مه، څلورم پړاو د چنګاښ په ۱۴،۱۵ او ۱۶مه او پنځم پړاو هغه یې د چنګاښ میاشتې په ۲۲مه نېټه اخیستل کېږي.»د ښاغلي حقاني په خبره، د افغانستان ټولو ولایتونو کې په څلورو بېلابېلو پړاوونو کې د کانکور عمومي ازموینه اخیستل کېږي او په پنځم پړاو کې له متفرقه او له بهر مېشتو کسانو څخه ازموینه اخیستل کېږي.نوموړي دا په ډاګه نه کړل، چې سږکال به د هېواد د ټولو ولایتونو څخه څومره زدهکوونکي د کانکور په عمومي ازموینه کې ګډون وکړي؛ خو وايي، د کانکور د ازموینې وخت مو تر څلورو ساعتو زیات کړی دی.حقاني په خپلو خبرو کې وویل، تېرکال کانکور ازموینې لپاره په پښتو، دري، انګلیسي او عربي ژبو شاوخوا ۴۰ زره نوې پوښتنې جوړې شوې او د راتلونکي کانکور ازموینې لپاره هم شاوخوا ۵۰ زره نوې پوښتنې د چمتو کېدو په حال کې دي.تېرکال د ازموینې ملي ادارې د هېواد په کچه ۴۴ لویې او وړې ازموینې اخیستې وې، چې په کې شاوخوا ۱۷۰ زره کسانو ګډون کړی و او نږدې ۱۲۰ زره په کې بریالي شوي وو.دغه طالب چارواکي د خپل رسنیز کنفرانس پر مهال په کانکور ازموینه کې د نجونو د ګډون په اړه هم معلومات وړاندې نه کړل.
