د روسیې د بهرنیو استخباراتو مشر وايي، د امریکا او بریتانیا ځانګړې ادارې «د افغانستان او منځنۍ اسیا هېوادونو د امنیت خرابولو لپاره له ترهګرو ډلو سره همکاري کوي.» د سرګي نارشیکین په خبره، د القاعده او داعش په څېر «ترهګرې ډلې د امریکا او بریتانیا د ځانګړو ادارو محصول دی.»
د تاس خبري اژانس د راپور له مخې، هغه زیاته کړه، چې امریکا څو کاله مخکې په افغانستان کې «شرموونکې» ماته وخوړه، خو د بریتانیا او امریکا ځانګړې ادارې لا هم په سیمه کې «د ترهګرو ملاتړ کوي چې نه یوازې په افغانستان بلکې د منځنۍ اسیا په ګاونډیو هېوادونو او ان ټوله اوراسیا کې حالت بې ټیکاوه کړي.»
نوموړي د امریکا او بریتانیا څارګرې ادارې تورنې کړي چې دا ډول «ترهګرې ډلې یې د سوریې د امن خرابولو لپاره کارولې، خو تر سوریې ډېر تاوان افغانستان لیدلی دی.»
له افغانستان د امریکايي او ناټو ځواکونو تر وتلو وروسته وخت ناوخت پر مسکو سربېره د منځنۍ اسیا هېوادونه هم وخت ناوخت اندېښنه ښيي چې له دغه هېواد دوی ته د «ترهګرو د نفوذ امکان شته.»
د روسیې د بهرنیو استخباراتو ادارې د مشر له نننیو خبرو سره هممهاله د قرغزستان د ملي امنیت مشر د بشکېک په یوه امنیتي ناسته کې د افغانستان په شمال کې د ترهګرو ډلو د زیاتوالي خبر ورکړی.
کامچيبېک تاشیف ویلي: «د افغانستان په شمال کې د ترهګرو ډلو ډېروالی د همګټو هېوادونو سوېلي پولو ته ریښتینی ګواښ دی.»
اذربایجان، ارمنستان، ازبکستان، بېلاروس، تاجکستان، روسیه، قرغزستان، قزاقستان او مولداوي د همګټو هېوادونو غړي دي.
