په کندهار کې د طالبانو د امنيه قومندانۍ وياند وايي، د دغه ولایت په ميوند ولسوالۍ کې په يوه ترافيکي پېښه کې د يوې ماشومې په ګډون درې کسان مړه او ۲۱ نور ټپيان شوي دي. اسدالله جمشيد وايي ټپیان، چې زيات يې ماشومان دي د کندهار ميرویس روغتون ته انتقال شوي دي.
په کندهار کې د طالبانو د امنيه قومندانۍ ویاند اسدالله جمشيد وايي، چې پېښه تېره ورځ ناوخته د ټېلر موټر او زرنج رکشا د ټکر له امله رامنځ ته شوې.
جمشيد زياتوي، چې په زرنج رکشا کې ماشومان زيات وو، نو ځکه ډېره برخه یې ټپيان شوي دي.
تېره ورځ په بلخ کې هم د یوې ټرافیکي پېښې له امله پنځه تنه مړه او پنځه تنه نور ټپيان شوي وه.
په هیواد کي لا هم د ترافيکې پېښو ګراف لوړ دی.
ډېر کسان د موټرونو تېز سرعت، بې احتیاطي، د ترافیکي اصولو نه مراعتول او غيري معياري سړکونه د ترافيکې پېښو د زياتېدو لاملونه يادوي.
د الماني رسنیو د رپوټونو له مخې، د جرمني په مانهایم ښار کې د اسلام د ښي اړخو منتقدینو پر غونډې برید کوونکی ۲۵ کلن سلیمان الف دی چې د افغانستان په هرات ولایت کې زیږدلی و.
د دغو رسنیو په وینا، په یاد برید کې شپږ تنه ټپیان شوي دي او د یو ټپي چې پولیس دی روغتیايي حالت نازک بلل شوی دی.
تر دې وړاندې د المان پولیسو ویلي و، چې په مانهایم ښار کې یو سړي له چاقو سره د اسلام د ښي اړخو منتقدینو پر غونډې برید کړی او څو تنه یې ټپیان کړي دي.
په ټپیانو کې د اسلام ضد د یوې مشهورې څېرې نوم هم لیدل کېږي.
د رویټرز خبري اژانس په ونیا، برید کوونکی د پولیسو له خوا ټپي شوی او بیا نیول شوی دی.
د افغانستان د ازادۍ جبهې د کابل په خیرخانه سیمه کې د شوې چاودنې مسوولیت پر غاړه واخیست. دغه جبهه وايي، چې په دې بريد کې د طالبانو دوه غړي وژل شوي او درې نور ټپيان دي.
په ورته وخت کې د ملي مقاومت جبهې د کابل ښار په پنځمه امنیتي حوزه کې د طالبانو د دوو غړو د وژل کېدو خبر ورکړی.
تر دې مخکې سیمه ییزو سرچینو افغانستان انټرنشنل ته د کابل په خیرخانه سیمه کې د یوې زورورې چاودنې د اوریدو خبر ورکړی و.
د افغانستان د ازادۍ جبهې په یوې اعلامیه کې ویلي، چې د جمعې په ورځ ماښام اته نیمې بجې د خواجه بغرا غونډۍ د پنجشد فامیلي سړک ته څېرمه یې د طالبانو د کورنیو چارو وزارت پر موټر برید کړی.
د ازادۍ جبهې د دغه برید ویډیو خپره کړه چې په کې چاودنه لیدل کېږي.
له بلې خوا د ملي مقاومت جبهې ویلي، چې د کابل ښار په پنځمه امنیتي حوزه کې یې د طالبانو دوه غړي وژلي او د دې ډلې یو بل غړی یې ټپي کړی دی.
د مقاومت جبهې په خبره په دې برید کې د دغې جبهې ځواکونو او ملکي وګړو ته کوم زیان نه دی اوښتی.
په هغې اعلاميه کې چې دغې جبهې د جمعې په ورځ خپره کړې، ويل شوي چې دغه بريد د شپې په ٨:٢٥ بجو شوى دى.
د مقاومت جبهه وايي، چې د دوی ځواکونو د کابل ښار د پنځمې امنیتي حوزې اړوند فضل بیک سیمه کې د طالبانو پر یوه موټر برید کړی دی.
طالب چارواکو تر اوسه د ازادۍ جبهې او مقاومت جبهې د بریدونو په اړه څه نه دي ویلي.
د ملي مقاومت جبهه وايي، چې د هېواد په بېلابېلو سیمو کې به د طالبانو پر ضد خپلو "هدفي" عملیاتو ته دوام ورکړي.
د څارویو یوې ملاتړې موسسې ویلي، چې کابل کې ۳۰۰ سپي او پیشوګانې امریکا کې د نوي ژوند پېلولو ته تیاري نیسي.
د کابل د کوچنیو څارویو د ژغورلو امریکايي موسسې وویل، چې امریکا ته د دغو څارویو د لېږد لپاره د چمتووالي ټول پړاوونه بشپړ شوي دي.
دا څاروي د امریکا واشنګټن، مریلنډ او ویرجینیا ته لېږدول کیږي او هلته به خپل دایمي کورونه پیدا کړي.
د کابل د کوچنیو څارویو د ژغورنې موسسې د چهارشنبې په ورځ پر خپلې اېکس پاڼې لیکلي، چې دغه څاروي به د څلورو ورځو څخه په لږه موده کې واشتنګټن ډي سي ته ولېږدول شی.
د دغه سازمان په وینا، د دغو سپیو او پیشوګانو د لېږدولو الوتکه به په اروپا کې لنډه دمه وکړي، چې په ترڅ کې به یې الوتکې ته تېل اچول کېږي او د څارویو درملنه او تغذیه به کېږي.
دغه څاروي به د جون په درېیمه واشنګټن ته ورسیږي او سمدستي به په ویرجینیا کې د پنډر څارویو پناه ځای په ګډون په بېلابېلو پناه ځایونو کې ځای پر ځای شي.
د دغه سازمان د فیسبوک پاڼې په یادښتونو کې راغلي، چې د دغو څارویو له ډلې څخه ډېری یې په «وحشتناک» حالت کې له کابل ښار څخه ژغورل شوي دي.
په ورته وخت کې ډبلیو اس ای۹ په نوم رسنۍ د کابل د کوچنیو څارویو د ژغورنې موسسې د بنسټګر او مشر شارلوټ ماکسول جونز له قوله لیکلي، چې نوموړي دغه ناانتفاعي موسسه شاوخوا پنځه کاله وړاندې جوړه کړې وه.
ښاغلي جونز زیاته کړه، چې دغه اداره په کابل کې ۹۲ کارکوونکي لري او ۱۵نور د څارویو د لېږد رالېږد په برخه کې کار کوي. هغه زیاته کړه، د کابل د کوچنیو څارویو د ژغورنې اداره په کابل کې د ۱۰متخصصینو په لرلو ۲۴ساعته فعال روغتون لري.
د هغه په وينا، دغه سازمان توانیدلی چې د دغو څارويو د لېږدولو لپاره د يوې کارګو الوتکې د اجاره کولو لپاره درېیو میاشتو کې ٨٢٠ زره ډالره راټول کړي.
ښاغلي جونز زیاته کړه چې له دغو پیشوګانو څخه به ۱۲ له متحده ایالاتو څخه کاناډا ته واستول شي او پاتې نور به د امریکا په ټولو ایالتونو کې خپل نوي کورونه ومومي.
د طالبانو تر واک لاندې افغانستان کې، د څارویو د ساتنې لپاره کوم سازمان یا میکانیزم شتون نه لري.
د طالبانو د استخباراتو عمومي ریاست یو مکتوب چې افغانستان انټرنشنل ته رسېدلي، په کې راغلي چې د دې ډلې د پاسپورټ عمومي رییس عبدالکریم حسیب په ګډون د کورنیو او بهرنیو چارو وزارتونو یو شمیر چارواکي د کمیشنکارۍ او فساد په تور نیول شوي دي.
پر دغو کسانو تور دی چې بهرنیو وګړو ته یې د طالبانو د کورنیو چارو او دفاع وزارتونو په مکتوبونو پاسپورټونه جوړ کړي دي.
په دغه مکتوب کې راغلي، چې د طالبانو د کورنیو او بهرنیو چارو وزارتونو رسمي مکتوبونه د پاسپورټ عمومي ریاست ته لیږل شوي او په کې غوښتل شوي چې د طالبانو غړو سره دې همکاري وشي او د سهمې له مخې دې پاسپورټ ورکړل شي.
د مکتوب په لومړی برخه کې راغلي، چې د طالبانو د استخباراتو عمومي ریاست ددې ډلې د مشر ملا هبت الله دفتر او د استخباراتو عمومي کمېسیون سره په همغږۍ کې دغه کسان نیولي دي.
طالبانو په دغه مکتوب کې دا نه ده په ډاکه کړې، چې د پاسپورټ عمومي رییس عبدالکریم حسیب سره د طالبانو د کورنیو چارو او دفاع وزارتونو کوم چارواکي نیول شوي دي او نه هم د هغوي شمېر او هویت په اړه څه ویل شوي دي.
د مکتوب په پای کې راغلي، چې نیول شوي کسانو په اړه د لازیاتو څېړونو په موخه د هغوی دوسیې کندهار کې د ملا هبت الله دفتر ته استول کیږي.
د طالبانو د استخباراتو عمومي ریاست د دغه مکتوب کاپيانې، د دې ډلې د استخباراتو عمومي کمېسیون، دفاع او کورنیو چارو وزارتونو ته لېږل شوي چې د طالبانو د استخباراتو عمومي رییس عبدالحق وثیق له خوا پرې لاسلیک شوی دی.
د طالبانو یو لوړپوړي چارواکي افغانستان انټرنشنل ـ پښتو خبریال عبدالحق عمري ته ویلي، چې د طالبانو استخباراتو عمومي ریاست د موندونو پر بنسټ شاوخوا ۱۰ زره پاسپورټونه د ۲۰۰۰ امریکايي ډالرو په بدل کې وېشل شوي دي.
دغه طالب چارواکي چې د خپل نوم له اخیستو ډډه کړې، ویلي، چې د طالبانو مشرانو ته د ملګرو ملتونو یو پلاوي داسې شواهد وړاندې کړي چې دغه پاسپورټونه د القاعدې غړو باندې وېشل شوي دي.
د طالبانو د استخباراتو عمومي ریاست په مکتوب دا نه دي ویل شوي، چې طالب چارواکو دغه پاسپورټونه چا ته اخیستي دي.
د طالبانو د کورنیو چارو وزارت ویاند عبدالمتین قانع تېره دوشنبې پر اېکس خپور کړي پیغام کې ویلي و، چې د دغې ډلې د پاسپورټ ادارې مشر مولوي عبدالکریم حسیب په کندهار کې نه دی توقیف شوی.
هغه ویلي و: "څه موده وړاندې، د ننګرهار په باریکاب کې د ځمکو په تړاو لاریونونه وشول، چې د همدې موضوع د وضاحت لپاره ښاغلی حسیب او د کورنیو چارو او ملي دفاع وزارت یو شمېر مسوولین د مشرتابه مقام ته غوښتل شوي دي."
عبدالمتین قانع ټینګار کوي، چې د پاسپورټ ریاست چارې په عادي توګه روانې دي او هېڅ کومه ستونزه پکې نه شته دی.
خو سرچينو افغانستان انټرنشنل ته ويلي؛ چې د طالبانو د پاسپورټ ریاست مشر د پنجشنبې - د غبرګولي درېمه - راهيسې د ملا هبت الله په امر نیول شوی او بندي دی.
اندري بلوسوف چې په دې وروستیو کې د ولادیمیر پوتین له خوا د روسیې د دفاع د وزیر په توګه ټاکل شوی، د تاجکستان او افغانستان تر منځ پر پوله د امنیتي تدابیرو پر ټینګښت ټینګار وکړ. هغه افغانستان د منځنۍ اسیا د بې ثباتۍ سرچینه وبلله او ویې ویل: «موږ د جګړې په لومړۍ کرښه کې یو.»
د روسیې نوي دفاع وزیر ټینګار وکړ چې د افغانستان وضعیت ته په کتو له تاجکستان او سیمې سره د دغه هېواد د پولو امنیت پیاوړي کولو ته اړتیا لري.
د روسیې د دولتي خبري اژانس ریانووستي د راپور له مخې، اندري بلوسوف دغه څرګندونې نن د تاجکستان له دفاع وزیر او په الماتا کې د ګډ امنیتي تړون د سازمان د وزیرانو د شورا په غونډه کې وکړې.
د روسیې د دفاع وزیر ویلي، څو افراطي ډلې په افغانستان کې ځای پر ځای شوې او په ګاونډیو جمهوریتونو کې یې د خپلو افکارو ترویج ته زور ورکړی دی.
د روسیې نوي دفاع وزیر خبرداری ورکړی، چې له هېواده بهر د ترهګرو ډلو د خپرېدو احتمال په ډېرېدو دی.
هغه د افغانستان وضعیت ته په اشارې سره زیاته کړه: «دا ټول د سیمې د وضعیت د ثبات لپاره دوامداره څارنې او پر وخت اقداماتو ته اړتیا لري. په ځانګړې توګه د تاجکستان او افغانستان ترمنځ پوله.»
د روسیې د دفاع نوی وزیر په سیمه کې د روسیې او تاجکستان د پوځی پرسونل د یووالي او د جنګی چمتووالي په زیاتولو ټینګار وکړ.
نوموړی په تاجکستان کې د روسیې د ۲۰۱ قول اردو اډې ته اشاره کوی، چې په تېرو څو کلونو کې یې له تاجکستان او نورو هېوادونو سره د افغانستان په پوله کې څو پوځی تمرینونه کړي دي.
اندري بلوسوف وویل: "مهمه مسله دا ده چې موږ اوس په لومړۍ کرښه کې یو، په جنوبي سرحدونو کې وضعیت خورا ستونزمن دی." سربېره پر دې، په افغانستان کې حالات او تمایلات مخ په خرابېدو دي، موږ یې څارو، پوهېږو چې څنګه ورسره کار وکړو، خو دا ټول زموږ پام ته اړتیا لري، زموږ یووالی او جګړه ییز چمتووالی زیاتېږي."
پر افغانستان د طالبانو واکمنېدو پسې تاجک چارواکو هم په سیمه ییزو ناستو کې څو څو ځله د افغانستان په شاوخوا کې د "امنیتي کمربند" جوړول اړین ګڼلي دي.
د مسکو په څنډه کې د مارچ د ۲۲مې له برید وروسته د روسیې او د ټولیز امنیت د تړون د غړو هېوادونو امنیتي اندېښنې نورې هم زیاتې شوې دي.